Թալիբները շարունակում են վրեժ լուծել այրված Ղուրանների համար. Աֆղանստանի հարավում գտնվող Ջալալաբադ քաղաքի օդակայանի մոտ տեղի ունեցած ռումբի պայթյունի հետևանքով զոհվել է նվազագույնը 9 մարդ, 10-ը ստացել են տարբեր աստիճանի վնասվածքներ: Այս մասին հայտնում է BBC-ն:
Իշխանությունների տվյալներով` օդակայանի մուտքի մոտ կայանած ավտոմեքենայի մեջ դրված է եղել պայթուցիկ սարք:
«Այս ահաբեկչությունը Ղուրանը այրելու վրեժն է»,- հայտարարել է «Թալիբան» շարժման ներկայացուցիչ Զաբիլլուա Մուջահիդը:
Հիշեցնենք, որ անցած երեքշաբթի «Բաղրամ» ռազմաբազայում աշխատակիցները մաքրություն անելիս աղբի մեջ գտել էին այրված Ղուրանի մի քանի օրինակ: Դրանից հետո թալիբները հայտարարեցին, որ պետք է վրեժ լուծեն սրբազան գրքի այրման համար:
Արդեն ահաբեկչությունների զոհ է դարձել ավելի քան 30 մարդ, տասնյակները ստացել են լուրջ վնասվածքներ: