Վրացական «Ռեզոնանսի» թերթի փոխանցմամբ՝ Վրաստանի և Հունաստանի միջև կարող է ծագել դիվանագիտական սկանդալ: Դրա պատճառը Հունաստանի վերաբերյալ Վրաստանի խորհրդարանի նախագահ Դավիթ Բաքրաձեի խոսքերն են:
Թերթն ընդգծում է, որ օրեր առաջ Վրաստանի շրջաններից մեկում տեղի բնակչության հետ հանդիպման ժամանակ Բաքրաձեն հայտարարել էր, որ թեև Հունաստանին տալիս են միլիարդներ, այնուամենայնիվ, նրա բնակչությունը դուրս է գալիս փողոց և ջարդուփշուր անում ամեն ինչ: Բաքրաձեն հավելել էր, որ Հունաստանին ոչինչ չի փրկում, քանի որ նրա ժողովուրդն ագրեսիվ է:
Ըստ Բաքրաձեի՝ եթե վրաց ժողովուրդը համբերատար չլիներ, ապա երկրում կտիրեր այնպիսի իրավիճակ, որը կարելի կլիներ համեմատել նույն Հունաստանի և անգամ Սոմալիի հետ:
Պաշտոնական Աթենքը դեռևս չի մեկնաբանել Բաքրաձեի այս հայտարարությունը:
