Քաղաքական և միջազգային հետազոտությունների հայկական կենտրոնի ռազմական փորձագետ Ռուբեն Մեհրաբյանն «Առաջին լրատվական»-ի հետ զրույցում իր մտահոգությունը հայտնեց բանակում հաճախակիացած՝ թոքաբորբով հիվանդացության դեպքերի և օրեր առաջ նույն հիվանդության պատճառով զինծառայող Նարեկ Մարտիրոսյանի մահվան կապակցությամբ: Նրա գնահատմամբ` այստեղ խնդիրը ոչ թե բժիշկների ոչ բարեխիղճ աշխատանքն է, այլ բանակում առկա ընդհանուր անհոգատար վերաբերմունքը զինծառայողի հանդեպ:
Փորձագետի խոսքով՝ ցավոք, զինծառայողները չեն ստանում անհրաժեշտ քանակի սնունդ, այդ թվում ճարպեր, քանի որ մարդը ձմռանը 40%-ով ավելի էներգիա է ծախսում, քան տաք եղանակին: Դրա հետևանքով նրանց օրգանիզմի դիմադրողականությունն ընկնում է, և թոքաբորբի պատճառով կարող են նաև մահանալ:
«Պատասխանատվությունը չպետք է դրվի բժշկական ծառայության վրա և պարզունակ բացատրություն տրվի, թե բժիշկները լավ չեն հասկանում, լավ չեն աշխատում: Ոչ, հարցն ավելի խորն է և պահանջում է համալիր լուծումներ»,- ասաց Ռ. Մեհրաբյանը:
