«Պոստ Սկրիպտում» մամուլի ակումբի այսօրվա հյուրն էր ԱԺ ՀՅԴ խմբակցության ղեկավար Վահան Հովհաննիսյանը, ով անդրադարձավ ներքաղաքական վերջին զարգացումներին և ՀՅԴ համամասնական ցուցակին:
Գնահատելով ներքաղաքական ներկա վիճակը՝ Վ. Հովհաննիսյանը նշեց, որ այն պայմանավորված է իշխանության անթաքույց տենչով՝ մնալ իշխանության։ Առկա է ևս մեկ գործոն` ամեն գնով խուսափել մարտիմեկյան գործընթացներից։
«Ընտրությունները երկու բան կարող են նշանակել` սերնդափոխություն և իշխանափոխություն: Երկուսն էլ անհրաժեշտ են մեզ՝ թե իշխանության, թե ընդդիմության պարագայում»,- նշեց նա:
Անդրադառնալով արտաքին քաղաքական զարգացումներին՝ Վ.Հովհաննիսյանը նկատեց, որ եվրոպական կառույցները ՀՀ իշխանություններին զգուշացրել են՝ թույլ չեն տալու նախկին ընտրությունների այլանդակությունները, քանի որ հենց ընտրություններն են արտահայտում ժողովրդավարության չափանիշները :
«Ցանկը մենք կկազմենք, և այն ցանկը, որը կհրապարակենք` կլինի հավաստին»,- նշեց Վ. Հովհաննսիյանը՝ անդրադառնալով ՀՅԴ համամասնական ցուցակի վերաբերյալ մամուլում շրջանառվող տարբեր տեղեկություններին:
Վ. Հովհաննիսյանը անդրադարձավ նաև «Արտակարգ դրության» մասին քվեարկությանը և նկատեց, որ այն ձևով, որով օրինագիծը բերվել էր խորհրդարան` անընդունելի է, բայց ցանկացած երկիր պետք է ունենա նման օրենք։ «Ամեն պարագայում բանակի ներգրավումը քաղաքական գործընթացներին անընդունելի է»,- շեշտեց ՀՅԴ խմբակցության ղեկավարը:
Վ. Օսկանյանի` ԲՀԿ-ին անդամակցությունը նա գնահատեց այսպես. «Ծայրահեղ են այն երկու դիրքորոշումները, երբ ոմանք անդամակցությունը համարում են անկարևոր մի բան՝ որևէ նշանակություն չունեցող, իսկ մյուսներն էլ դա փորձում են համարել ինչ-որ կենտրոնների կողմից թելադրված գործընթաց: Բայց Օսկանյանի անդամակցությունից միայն ԲՀԿ-ն չի շահել, նաև Օսկանյանն է շահել, քանի որ իր քաղաքական հայացքներն է ներկայացնելու մի լուրջ կուսակցությունում…
Կոալիցիոն կուսակցությունների՝ ընտրություններին առանձին մասնակցելու որոշումը ցույց տվեց, որ առաջին համաձայնությունը չի գործում, և այդ պայմանավորվածությունը կարող է տարածվել մեծամասնականի դեպքում` երբ նրանք պայմանավորվեն իրար դեմ թեկնածություններ չդնել»,- նկատեց Վ. Հովհաննիսյանը:
Վ. Հովհաննիսյանը չի բացառում ընտրակեղծիքների դեմ պայքարում ընդդիմության միասնական շտաբի կազմավորումը. «Ընտրական խարդախությունների դեմ պայքարելու ձևերը մեխանիկական են` պառկել քվեատուփի վրա, պինդ տղերք ուղարկել…. Իրական ձևը մեծամասնական ընտրակարգը վերացնելն է: Ընտրակեղծիքները հիմա արդեն իսկ կան` հիմա փող են բաժանում, դու սրա դեմը չես կարող առնել… Ընդհանուր շտաբը վճռական նշանակություն չի կարող ունենալ ընտրակեղծիքների դեմ պայքարի հարցում»:
«Ոչ նախագահը, ոչ նախարարը չեն կարող որոշել այն կատեգորիաները, ըստ որոնց՝ մարդը կարող է առաջադրվել ԱԺ պատգամավոր` Սահմանադրությունը շրջանցելով: Ինչո՞ւ ձեռներեցներին չեք բերելու խորհրդարան: Ես քմիծիծաղով եմ վերաբերվում այդ հայտարարություններին, որովհետև մեծամասնականով այդ նույն մարդիկ կմտնեն ԱԺ, հետո կմտնեն այդ ֆրակցիան»,- հայտարարեց Վ. Հովհաննիսյանը` անդրադառնալով ՀՀԿ-ականների հայտարարություններին, թե համամասնական ցուցակում ձեռներեցներ չեն լինելու:
«ՀԱԿ-ը տեղավորվեց իշխանությունների ծրագրերի մեջ, քանի որ այն անթաքույց ձգտում էր քաղաքական գործընթացներում ցույց տալ սեփական իշխանության հաստատումը, և նրա ձգտումը իրականացվեց իշխանությունների կողմից. նրանք դա տեսան, և տեղի ունեցավ երկխոսություն: Բայց արդեն երկխոսությունից հետո ՀԱԿ-ը դուրս եկավ թուլացած, իսկ իշխանությունը` ուժեղացած, ուստի չեմ կարծում, թե իշխանությունները նոր մոտիվացիաներ գտնեն` քաղաքական իրավիճակը փոխելու»,- նկատեց Վ. Հովհաննիսյանը` անդրադառնալով իշխանությունների կողմից քաղաքական նոր գործընթացներ ծավալելու հնարավորություններին: