Ինչպես գրում է սերբական Mondo թերթը, Անջելինա Ջոլիի «Արյան և մեղրի երկրամաս» ֆիլմի ցուցադրությանը եկել է 12 մարդ, որոնցից մի մասը մինչև ֆիլմի ավարտը լքել է դահլիճը: «Այս ֆիլմն ամենևին էլ սիրո մասին չէ, ինչպես պատմում էր նրա հեղինակը»,- ասել է Delta կինոթատրոնը լքող այցելուներից մեկը:
«Ամոթ է, երբ ֆիլմի ցուցադրությանը գալիս է 12 մարդ, սակայն այն փաստը, որ որոշ մարդիկ մինչև ֆիլմի ավարտը լքում են դահլիճը, խոսում է այն մասին, որ ամոթ է ընդհանրապես նման ֆիլմեր նկարահանելը»,- ասել է դիտողներից մեկը:
Ֆիլմը պատմում է Բոսնիայում տեղի ունեցած պատերազմի մասին: Սա պատմություն է համակենտրոնացման ճամբարում հայտնված մուսուլման կին Ալեի մասին, որը բռնաբարվում է սերբ զինվորների կողմից: Սերբերից մեկը ճանաչում է Ալեին, որի հետ հանդիպել էր մինչև պատերազմը:
Ֆիլմը նկարահանվել է Հունգարիայում, քանի որ թե՛ Սերբիայում և թե՛ Բոսնիա Հերցեգովինայում ֆիլմի նկատմամբ ոչ միանշանակ վերաբերմունք կար: Ջոլին սյուժեի վերաբերյալ բոլոր քննադատությունները մերժում է:
