Անցյալ տարեվերջին Հայ ազգային կոնգրեսի ներկայացուցիչները տարբեր առիթներով հայտարարեցին, որ իշխանական բուրգը կանգնած է փլուզման առջև, և որ 2011 թվականը լինելու է իշխանափոխության տարի: «Առաջին լրատվականը» Հայ ազգային կոնգրեսին մաս կազմող «Հանրապետություն» կուսակցության քաղխորհրդի անդամ, Երևանի նախկին քաղաքապետ և ՀՀ ներքին գործերի նախկին նախարար Սուրեն Աբրահամյանից հետաքրքրվեց, թե որքանով են իրատեսական նման կանխատեսումները: «Լինելով Հայ ազգային կոնգրեսի անդամ` «Հանրապետություն» կուսակցությունն իր գործողություններով ամեն ինչ անում է, որ իշխանափոխությունը տեղի ունենա հնարավորինս շուտ: Մեր գլխավոր նպատակը դա է, քանի որ երկրի սահմանադրական կարգը խախտվել է ընտրությունների ժամանակ: Եվ հենց արդար ընտրություններով էլ հնարավոր է վերականգնել սահմանադրական կարգը»,- մեր հարցին արձագանքեց Սուրեն Աբրահամյանը: Ընդդիմադիր գործչից հետաքրքրվեցինք նաև, թե Հայ ազգային կոնգրեսը բավարար չափով օգտագործո՞ւմ է իր ներուժը հռչակած նպատակին` սահմանադրական կարգի վերականգնմանը հասնելու համար: «Եթե խնդիրը դիտարկենք քաղաքական քայլերի տեսանկյունից, ապա կարծում եմ` այո: Կան որոշակի խնդիրներ, որոնց լուծումը տարբեր մարդիկ տարբեր կերպ են պատկերացնում: Սակայն քաղաքական հարթությունում Հայ ազգային կոնգրեսն անում է այն, ինչ հնարավոր է անել այս տոտալիտար համակարգում»,- կարծում է Սուրեն Աբրահամյանը:
