Մայրաքաղաքի բաձրահարկ շենքերի վերելակներում սարսափելի վիճակ է: Եթե մինչ այժմ բնակիչների բողոքները վերաբերում էին դրանց կեղտոտությանն ու անսարքությանը, հիմա այս ամենին մեկ այլ խնդիր է ավելացել. խոսքը վերաբերում է վերելակների ներսում ամրացված գովազդային վահանակներին: Եթե սկզբում կոնկրետ Էրեբունի համայնքի բնակիչներն ուրախանում էին, որ վերելակի խցիկը ակնահաճո է, պատի կեղտն ու խազերն էլ ծածկվել են, ապա որոշ ժամանակ անց, երբ գովազդները սկսեցին անընդհատ թարմացվել, վերելակի պատերին նորանոր անցքեր ավելացան. ամեն անգամ` 4 նոր անցք: Բնակիչներին անհանգստացնում է, թե հետո, երբ տեղադրվող գովազդը այդտեղից անհետանա, ո՞վ է փակելու այդ անցքերը, եթե հաշվի առնենք նաև այն, որ այդ փոքր անցքերը օրեցօր մեծանալու են և դառնալու պատուհանի չափ: Իսկ Հարավարևմտյան թաղամասի բարձրահարկ շենքերից մեկի բնակչին անհանգստացնում են հատկապես վերջին շրջանում վերելակի ներսում փակցվող տարբեր ոչ կոռեկտ բովանդակության հայտարարությունները, որոնք, ի դեպ, ոչ միայն ՀԱԹ-ում են հադիպել:
