Անբարոյականություն է Հոկտեմբերի 27 իրականացնողներին քաղբանտարկյալ համարելը: Այսօր «Առաջին լրատվական»-ի հետ զրույցում ասաց Հայ ազգային կոնգրեսի ներկայացուցիչ Սուրեն Աբրահամյանը`անդրադառնալով իրավապաշտպաններից մեկի այն խոսքին, թե քաղբանտարկյալ է համարում Հոկտեմբերի 27 իրականացնողներին:
Նա ցավով նշեց, որ Հոկտեմբերի 27-ը դեռևս չի բացահայտվել: «Այդ պատճառով մարդիկ կարող են նման հայտարարություններ անել, որը ես սրբապղծություն եմ համարում: Իսկ Հոկտեմբերի 27-ի կազմակերպիչներին ի՞նչ գնահատական տանք, նրանց նույնպե՞ս պետք է նման որակում տալ»,- հարց հնչեցրեց Ս. Աբրահամյանը` հավելելով, որ չէր պատկերացնի երբևէ, որ նման որակում և կարծիք կլսի:
Հիշեցնենք, որ այսօր տեղի ունեցած ասուլիսի ընթացքում, անդրադառնալով կրոնի և խղճի ազատության սահմանափակման խնդրին, իրավապաշտպան Միքայել Դանիելյանը նշել էր, որ խղճի գերի է համարում ՀԱԿ ակտիվիստ Տիգրան Առաքելյանին, իսկ որոշ չափորոշիչներով՝ քաղբանտարկյալներ է համարում նաև Հոկտեմբերի 27-ը իրականացնողներին: