Հունվարի 7-ին Ագարակում տեղի ունեցած ծեծկռտուքից հետո, Ագարակի քաղաքապետի եղբայր Մհեր Զաքարյանը երեկվանից ոստիկանության Մեղրիի բաժնում է: 1972թ.-ին ծնված Մհեր Զաքարյանը բացատրություն է տվել, որ ինքն է վիճաբանության ժամանակ խփել գործարար Արարատ Հովհաննիսյանին:
Հիշեցնենք, որ օրեր առաջ քաղաքապետի ու գործարարի մտերիմների միջև ծագած հակասությունը երեկ գագաթնակետին է հասել, ինչին խառնվել են նույնիսկ ոստիկանները: Նշենք, որ միջադեպի արդյունքում տուժել են 1970թ.-ին ծնված Արարատ Հովհաննիսյանն ու 1972թ. ծնված Սոս Խաչատրյանը: Երկուսն էլ Ագարակի հիվանդանոցում բուժօգնություն ստանալուց հետո գնացել են տուն` հրաժարվելով մնալ հիվանդանոցում: Ըստ Ագարակի հիվանդանոցի գլխավոր բժիշկ Ծաղիկ Վարդանյանի` նրանց վիճակը բավարար է: Ինչ վերաբերում է տուժածների այն հայտարարությանը, որ բժիշկները չէին ուզում օգնություն ցույց տալ` տիկին Վարդանյանը հերքեց: «Նման բան չի եղել, մենք վիրահատության ենք եղել: Միայն ռենտգենոլոգն է մի 15 րոպե ուշացել: Դե ոչ աշխատանքային օր է, մարդը գար հիվանդանոց ի±նչ աներ: Մինչև տնից հասավ որոշակի ժամանակ անցավ»,- ասաց Ծ. Վարդանյանը` ավելացնելով, որ տուժածները նյարդային վիճակում էին ու հնարավոր է, առաջին պահին նման տպավորություն ունենային: Ինչպես տեղեկացնում են Ագարակի մեր աղբյուրները, քաղաքում լարված մթնոլորտ է: Մայրաքաղաքից նույնպես իրավապահներ ու հետաքննիչներ են եկել: Առայժմ ոստիկանության Մեղրիի բաժինը ոչ մի պաշտոնական տեղեկատվություն չի տալիս: Այս պահին միջադեպի առիթով նյութեր են նախապատրաստվում: