Թուրքական Hürriyet թերթի փոխանցմամբ՝ Թուրքիայի և Չինաստանի կենտրոնական բանկերը համաձայնագիր են ստորագրել արժույթի երկկողմ փոխանակման շուրջ: Համաձայնագրի ստորագրման արարողակարգին մասնակցել են նաև Թուրքիայի նախագահ Աբդուլլահ Գյուլն ու Չինաստանի փոխնախագահ Սի Ցզինպինը:
Եռամյա ժամկետով կնքված պայմանագրի հիմնական նպատակը տեղի արժույթով երկու երկրների միջև առևտրային գործարքների հեշտացումն է: Կողմերի համաձայնությամբ պայմանագրի ժամկետը կարող է երկարաձգվել:
Հիշեցնենք, որ երեկ բրիտանական The Guardian թերթը գրել էր, թե Թուրքիան և Չինաստանը գաղտնի օգնում են Իրանին նրա նկատմամբ սահմանված նավթային ու ֆինանսական պատժամիջոցները շրջանցելու հարցում: Մասնավորապես, Թուրքիան և Չինաստանը գաղտնի ֆինանսական օգնություն են ցուցաբերում Իրանին՝ նրան թույլ տալով օգտվել իրենց ֆինանսական կառույցներից՝ վերոնշյալ պատժամիջոցները հաղթահարելու հարցում: Իրանի Կենտրոնական բանկն օգտվում է թուրքական և չինական բանկերի ծառայություններից երկրի տնտեսական անկումը կանխելու համար: