Հունվարի 7-ին Ագարակ քաղաքի կենտրոնական հրապարակում բախում է տեղի ունեցել քաղաքապետ Մխիթար Զաքարյանի մտերիմների ու գործարար Արսեն Հովհաննիսյանի ընկերների միջև: Ամեն ինչ սկսվեց հունվարի 3-ին, երբ քաղաքապետի աներձագը` Արտյոմը, և փոխքաղաքապետ Գևորգ Խաչատրյանը որոշում են նշել Ամանորը: Ռեստորանը այնպիսի վայրում է, որ հանդիպակաց մեքենաներից որևէ մեկը պետք է զիջեր ճանապարհը: Սակայն ո՛չ քաղաքապետի կողմնակիցները, ո՛չ էլ Արսեն Հովհաննիսյանի տղան` Սերգեյը, չեն ուզում փոխզիջման գնալ: Իրար հետ լեզու չեն գտել, ծեծկռտուք է տեղի ունեցել, հետո հաշտվել են, իրար հրաժեշտ տվել:
Սակայն դեպքի հաջորդ օրը քաղաքի կենտրոնում Արսեն Հովհաննիսյանը, տեսնելով Գևորգին, առաջարկում է տեղափոխվել իր մեքենան ու զրուցել: Գևորգը հրաժարվում է: Ականատեսների պատմելով, Արսենը հանում է զենքն ու կրակում Գևորգի ուղղությամբ: Իսկ երբ վերջինս փորձում է մեքենայով հեռանալ` կրակում է նրա հետևից: Երկու օր Արսենը չի երևում, տնից դուրս չի գալիս ու ասում է, որ պատրաստ է ներողություն խնդրելու:
Հունվարի 7-ի առավոտյան նա կրկին հանդիպում է փոխքաղաքապետին: Վերջինս Արսենից բացատրություն է պահանջում տեղի ունեցած միջադեպի առիթով: Արսեն Հովհաննիսյանը կրկին դիմում է զենքի օգնությանն ու արդեն նոր վեճ է սկսվում, ինչին խառնվում է քաղաքապետի եղբայրը` Մհեր Զաքարյանը: Բախման ժամանակ մեքենաներից մեկը հարվածում է Արսենի ընկերոջը` Սոս Խաչատրյանին: Որոշ տեղեկություններով, հենց Արսենն է իր «Ջիփ»-ով սխալմամբ հարվածել ընկերոջը: Ագարակցիների պատմելով` Ա.Հովհաննիսյանը հրապարակում, նռնակը ձեռքին, հայհոյել է քաղաքապետին: Այս անգամ վեճին խառնվել են ոստիկանները:
«Ոչ մի քաղաքական հաշվեհարդար չկա: Ոչ մեկը չի ուզում խլել նրա բիզնեսը, ինչպես նա է տարածել որոշ լրատվամիջոցներով»,- մեզ հետ ունեցած հեռախոսազրույցում ասաց Ագարակի քաղաքապետը: «Լավ, մասնակիցներն իմ բարեկամներն են, բայց միայն հիմար մարդը կարող է սա քաղաքապետի կողմից սադրանք համարել: Ես ամենայն պատասխանատվությամբ ասում են, որ դիտավորյալ ոչինչ չի եղել ու կարծում եմ գործի քննությունը կպարզի ամեն ինչ»,- ասաց քաղաքապետ Մ. Զաքարյանը: Տեղեկացնենք, որ Արսեն Հովհաննիսյանի մտերիմները դեպքը բացատրում են նրանով, որ 2 տարի առաջ` Ագարակի քաղաքապետի ընտրությունների ժամանակ, Արսեն Հովհաննիսյանը չի պաշտպանել ներկայիս քաղաքապետ Մխիթար Զաքարյանի թեկնածությունը, ինչի պատճառով էլ վերջինս մինչ օրս վրեժխնդիր է լինում` բացահայտ հայտարարելով, որ Արսենին Ագարակից վտարելու է:
Ագարակի հիվանդանոցի գլխավոր բժիշկ Ծաղիկ Վարդանյանը մեզ հետ ունեցած հեռախոսազրույցում ասաց, որ թե՛ Սոս Խաչատրյանին, թե՛ Արսեն Հովհաննիսյանին բուժօգնություն է ցուցաբերվել: «Ս.Խաչատրյանի մոտ սալջարդեր կային, վիճակը բավարար է: Նա նույնիսկ հայտարարեց, որ իր տան աստիճաններից վայր է ընկել, ու հրաժարվեց մնալ հիվանդանոցում: Նա ստորագրությամբ հաստատել է, որ իր կամքով է գնում տուն»,- ասաց բժիշկը:
Մի քանի ժամ հետո հիվանդանոց են բերում Արսեն Հովհաննիսյանին: Վերջինս շաքարային դիաբետ ունի, և նյարդային սթերսի մեջ է: «Ոտքի, գլխի, փափուկ հյուսվածքների սալջարդ կա: Նա նույնպես հրաժարվեց ստացիոնար բուժում ստանալուց: Առաջին բուժօգնություն տրամադրելուց հետո նա ևս ստորագրեց ընդունարանի գրանցամատյանում, որ իր կամքով է հրաժարվում հիվանդանոցում մնալուց»,-ասաց Ծ. Վարդանյանը: Մեղրու ոստիկանությունում փաստի առնչությամբ այս պահին նյութեր են նախապատրաստվում: