Երևանի քաղաքապետարանի տեղեկատվության և հասարակայնության հետ կապերի վարչության աշխատակից Արթուր Սարուխանյանն այսօր «Առաջին լրատվական»-ին որոշ մեկնաբանություններ տվեց օրեր առաջ Facebook-ում բնապահպան ակտիվիստների հասցեին հնչեցրած վիրավորանքների «մասով»: Հիշեցնենք, որ վերջինս ի պաշտոնե հրաժարվել էր շաբաթ՝ ոչ աշխատանքային օրը, պատասխանել մեր հարցերին:
«Մենք ենք այս քաղաքի տերը» նախաձեռնությունը հաղորդագությամբ արձագանքել էր քաղաքապետարանի աշխատակիցներին և համապատասխան մարմիններից պահանջել լուրջ կադրային փոփոխություններ, որպեսզի քաղաքացիներին անտեղի անվանարկող և բացահայտ լկտի վիրավորանքներ տեղացող անձինք ոչ միայն պատասխանատվության ենթարկվեն, այլև մեկընդմիշտ հեռացվեն պետական կառավարման համակարգից:
Այս առնչությամբ Ա. Սարուխանյանը հայտնեց հետևյալը. «Պատասխանատվության ենթարկողը ես չեմ, ուստի այդ առիթով որևէ մեկնաբանություն չեմ կարող անել»: Նաև հավելեց. «Արթուր Սարուխանյան քաղծառայողը, քաղաքապետարանի պաշտոնյան նման արտահայտություններով հանդես չի եկել: Որպես պաշտոնյա նման քննարկում ծավալելու իրավասու չէի: Այդ դեպքում հանդես է եկել շարքային քաղաքացի Արթուր Սարուխանյանը, ում անձը վիրավորել են ամենավերջին, ստոր արտահայտություններով, և կարծում եմ, որ իրեն հարգող յուրաքանչյուր քաղաքացի իրավունք ուներ պատասխանելու իրեն վիրավորողին»:
Մեր դիտարկմանը, թե վիրավորանքներն ինքն արել է հրապարակային՝ քաղաքապետի պաշտոնական Facebook-յան էջում, նա այսպես արձագանքեց. «Ինձ քաղաքապետի էջում վիրավորել է անանուն, անդեմ ինչ-որ մեկը, եթե հանդես գար, գուցե այլ ընթացք ստանար: Ես ընդամենը պատասխանել եմ անանուն սադրիչի սադրանքին, որն իրեն իրավունք է վերապահել ինձ վիրավորել: Ցավում եմ, որ ներքաշվել եմ այդ սադրանքի մեջ, բայց իրեն հարգող յուրաքանչյուր քաղաքացի կպատասխաներ դրան, որովհետև չճանաչելով մեկին, անվանել էր ստրուկ, պնակալեզ»:
Մեր զրուցակիցը գտնում է, որ Մաշտոցի այգու պահպանման համար պայքարող բնապահպան ակտիվիստների մեջ իրականում կան ազնիվ մղումներով անձնինք, ինչը ողջունում է. «Այլ բան է՝ ես կիսո՞ւմ եմ նրանց տեսակետը, թե՞ ոչ»: Ա. Սարուխանյանն ասաց, որ իր վիրավորանքն ուղղված չի եղել վերջիններիս և ցավում է, որ Հրանտ Տեր-Աբրահամյանն էլ է իրեն վիրավորված համարում:
Վերջում քաղաքապետարանի աշխատակիցը հարց ուղղեց. «Իսկ ինձ վիրավորողը պատրա՞ստ է ինձնից ներողություն խնդրել»:
Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանից հետաքրքրվեցինք, թե պատասխանատվության չե՞ն ենթարկվելու քաղաքապետարանի այն աշխատակիցները, որոնք անձնական վիրավորանքներ էին արել քաղաքապետ Տարոն Մարգարյանի Facebook-ի էջում: «Ես չեմ մեկնաբանում մի բան, որն իմ անձի հետ կապված չէ»: Թե ով է իրավասու պատասխանել, կարճ կտրեց. «Չեմ կարող ասել»:
Երևանի քաղաքապետարանի տեղեկատվության և հասարակայնության հետ կապերի բաժնի պետ Շուշան Սարդարյանն էլ ասաց, որ ինքը տեղյակ չէ, թե ինչ վիրավորանքների մասին է խոսքը և միայն ծանոթանալուց հետո կարող է պատասխանել:
