The Guardian-ի տեղեկացմամբ՝ ԱՄՆ-ում 74 տարեկան հասակում մահացել է բրիտանացի ճանապարհորդ Ջոն Ֆեյրֆոքսը: Նա առաջին մարդն է, որ Ատլանտյան օվկիանոսը հատել է թիավարելով:
Ջոն Ֆեյրֆոքսը վախճանվել է փետրվարի 8-ին Նևադա նահանգի Հենդերսոն քաղաքի իր սեփական տանը: Ֆեյրֆաքսի մահվան մասին հայտնվել է փետրվարի 19-ին:
Բրիտանացի Ֆեյրֆոքսը հայտնի է դարձել 1969 թ.` դառնալով առաջին մարդը, ով միայնակ նավով անցավ Ատլանտյան օվկիանոսը: «Բրիտանիա» նավով նա մոտ 8045 կմ երկարությամբ ճանապարհ անցավ, որը սկսվում էր Կանարյան կղզիներից և ավարտվում Ֆլորիդայի ափերի մոտ: Ընդհանուր առմամբ նա օվկիանոսում անցկացրել է մոտ 180 օր: Ճանապարհորդության ընթացքում նրա վրա հարձակվել են շնաձկները:
1972 թ. Ֆեյրֆոքսը և նրա ընկերուհին՝ Սիլվիա Քուկը, հատեցին Խաղաղ օվկիանոսը: Այս անգամ ճանապարհորդությունը տևեց գրեթե մեկ տարի: Նրանք մոտ 12.9000 կմ տարածություն անցան:
Այդ ճանապարհորդությունների մասին Ֆեյրֆոքսը գրքեր է գրել, որոնք հրատարակվել են 1970 թ.: Պետք է նշել, որ կարճ ժամանակ անց նրա ձեռքբերումը կրկնեց մեկ այլ բրիտանացի՝ Թոմ Մաքլինը: Նա Ատլանտյան օվկիանոսը հատեց արևմուտքից արևելք` սկսելով Նյուֆաունդլենդ կանադական կղզուց և ավարտելով Իռլանդիայի ափերի մոտ: Իսկ առաջին կինը, ով 1999 թ. միայնակ անցել է օվկիանոսը՝ ամերիկացի Թորի Մուրդենն է:
1997-ից անցկացվում է Atlantic Rowing Race մրցույթը, որի մասնակիցները պետք է անցնեն Ֆեյրֆոքսի անցած ճանապարհը` Կանարյան կղզիներից մինչև Կարիբյան ծովի կղզիներ: