ԵԿՄ համագումարում Սերժ Սարգսյանի ելույթը, թերևս, պարունակում էր երկու հիմնական պատգամ: Առաջինը՝ այն, որ նա փորձում էր «Երկրապահ»-ին դարձնել իր գլխավոր հենարաններից մեկը առաջիկա նախընտրական պայքարում: Այս փորձը հատկապես ուշագրավ է դառնում ԲՀԿ-ի հետ հնարավոր մրցակցության ֆոնին, առավել ևս՝ նկատի ունենալով այն, որ «Բարգավաճ Հայաստանը» կարծես թե ավելի է հայտնվում Ռոբերտ Քոչարյանի ծիրում՝ ի դեմս Վարդան Օսկանյանի անդամակցության: Այդ պարագայում Սերժ Սարգսյանի համար «Երկրապահը» դառնում է առավել քան կարևոր՝ նկատի ունենալով այն, որ Ռոբերտ Քոչարյանն իր հիմնական շեշտադրումներից մեկը կատարում է նաև հասարակական-քաղաքական կյանքի հենց այդ սեգմենտի վրա: Այլ կերպ ասած՝ Սերժ Սարգսյանը փորձում է «Երկրապահը» պահել իր քաղաքական և նույնիսկ անձնական ծիրում, ինչով էլ, ըստ էության, պայմանավորված էր նրա մտերմական դիմելաձևը՝ «տղերք ջան», որը, ընդ որում, ելույթի ընթացքում կրկնվեց երեք անգամ:
Այդպիսով Սերժ Սարգսյանը փորձ է անում ոչ միայն քաղաքական գործընկերությունը երաշխավորել, այլ նաև անձնական մտերմությունը, որպեսզի երկրապահները նաև այդ առումով կաշկանդված լինեն նրա դեմ հնարավոր որևէ սեպարատ գործողությունից: Իսկ եթե Ռոբերտ Քոչարյանը մտնում է խաղի մեջ, թեկուզ անուղղակի, ապա կասկած չկա, որ նա, որպես իր գործիքներից կամ զենքերից մեկը, փորձելու է կիրառել ԵԿՄ գործոնը՝ դրանով նշանակալից, էական ճնշում բանեցնելով Սերժ Սարգսյանի վրա: Ի վերջո, պետք չէ մոռանալ, որ 1998 թվականի ներիշխանական հեղաշրջմանը« ժամանակ էական դեր խաղաց նաև հենց այդ գործոնի խաղարկումը: Այդ ամենը նկատի առնելով էլ, թերևս, Սերժ Սարգսյանը փորձեց հնարավորինս ընդգծված ձևով ցույց տալ իր ազդեցությունը ԵԿՄ վրա՝ միևնույն ժամանակ ձգտելով նաև այդ ազդեցությունը ներկայացնել ոչ թե որպես պարտադրանք, այլ որպես մարդկային ջերմ և փոխադարձ հարգանքի գրավական:
Հաջորդ պատգամը ուղղված էր թերևս հասարակությանը՝ հասարակություն-բանակ վերջին շրջանի զարգացումների համատեքստում: Բանն այն է, որ Սարգսյանը բավական հաճախ էր հիշատակում այն, որ հայկական բանակը կազմավորվել է ԵԿՄ հիմքի վրա, ԵԿՄ ջանքերով, որ երկրապահն է այդ բանակի ակունքը: Այսինքն՝ նա կարծես թե հասարակական քննադատությունից պաշտպանվելու համար դիմում էր «Երկրապահ»-ի աջակցությանը՝ առաջարկելով գալ և իր հետ միասին պաշտպանվել հասարակական քննադատությունից: Այլ կերպ ասած՝ Սերժ Սարգսյանի ելույթում կարծես թե նկատվում էր ջանք՝ «Երկրապահ» հասկացության բարոյական ասպեկտները, որ մեր հասարակության մեջ ունեն յուրօրինակ հարգալից ընկալում, կիրառել բանակում առկա իրավիճակի վերաբերյալ հասարակական խիստ քննադատությունից իշխանությանը և մասնավորապես իրեն պաշտպանելու համար:
