Հայտնի են Իսպանիայի գավաթի խաղարկության 1/4 եզրափակիչի բոլոր մասնակիցները: Հունվարի 5-ին և 6-ին կայացան 1/8 եզրափակիչի պատասխան հանդիպումները: Երեկվա հանդիպումներից հատկապես մեծ հետաքրքրություն էր առաջացնում վալենսիական դերբին: Թվում էր` դեռ առաջին խաղակեսում Էմերիի սաները լուծել են իրենց առջև դրված խնդիրը, բայց երկրորդ խաղակեսի սկզբում «Վիլյառեալ»-ին հաջողվեց հավասարեցնել հաշիվը, սակայն 2:2 հաշիվը դեռ ձեռնտու էր «Վալենսիա»-ին: Շուտով «Վիլյառեալ»-ին հաջողվեց ևս երկու գնդակ ուղարկել մրցակցի դարպասը: Այսպիսով, հաջորդ փուլ դուրս եկավ Խուան Կառլոս Գարիդայի թիմը: Ուշադրության է արժանի նաև «Ռեալ»-ի կրած պարտությունը, սակայն եթե հաշվի առնենք այն «ջարդ»-ը, որ մադրիդցիները կազմակերպել էին առաջին խաղում, ապա նրանք կարող էին իրենց թույլ տալ անգամ աղջիկների թիմ ուղարկել «Լևանտե»-ին հյուր: «Ալմերիա»-ն պատասխան խաղում էլ նույն 3:4 հաշվով հաղթեց «Մալյորկա»-ին: «Էսպանյոլ»-«Ատլետիկո Մադրիդ» հանդիպումն ավարտվեց 1:1 հաշվով, մադրիդցիները կխաղան 1/4 եզրափակիչում: «Բետիս»-ը հյուրընկալվելիս 1:3 հաշվով հաղթեց «Խետաֆե»-ին և դուրս եկավ հաջորդ փուլ: Հունվարի 5-ին կայացած հանդիպումներում գրանցվել են հետևյալ արդյունքները` «Ատլետիկ Բիլբաո»-«Բարսելոնա»` 1:1, «Դեպորտիվո»-«Կորդովա»` 3:1, «Մալագա»-«Սևիլիա»` 0:3: «Բարսելոնա»-ն, «Դեպորտիվո»-ն և «Սևիլիա»-ն կխաղան 1/4 եզրափակիչում:
1/4 եզրափակիչի զույգերն են.
«Ալմերիա»-«Դեպորտիվո»
«Բարսելոնա»-«Բետիս»
«Ռեալ»-«Ատլետիկո»
«Վիլյառեալ»-«Սևիլիա»