ԱՄՆ-ի գործողություններն արտաքին քաղաքականության ոլորտում չեն տեղավորվում որևէ միջազգային իրավական շրջանակի մեջ։ Այս մասին «Իզվեստիա»-ի հետ հարցազրույցում հայտարարել է Ռուսաստանի արտաքին գործերի նախարար Սերգեյ Լավրովը։
«Այն, ինչ (Վաշինգտոնն) անում է արտաքին քաղաքականության ոլորտում, իհարկե, չի տեղավորվում որևէ միջազգային իրավական շրջանակի մեջ։ (ԱՄՆ նախագահ) Դոնալդ Թրամփն անձամբ հայտարարել է, որ իրեն չեն հետաքրքրում միջազգային իրավունքի նորմերը, որ ինքն ունի իր սեփական բարոյականությունը և իր սեփական բնազդները», – ասել է նախարարը Պետերբուրգի միջազգային տնտեսական համաժողովի շրջանակներում պարբերականի հետ զրույցում։
Անդրադառնալով ռուս-ուկրաինական հակամարտությանը՝ Լավրովը նշել է, որ Միացյալ Նահանգները միակն է, որը ճանաչել է ուկրաինական ճգնաժամի արմատական պատճառը լուծելու անհրաժեշտությունը՝ Ռուսաստանի անվտանգության վերաբերյալ մտահոգությունները՝ կապված ՆԱՏՕ-ում Ուկրաինայի ներգրավվածության հետ։ Նրա խոսքով՝ ԱՄՆ-ն նաև անհրաժեշտ է համարում ընդունել այն իրողությունները, որ ստեղծվել են տեղում Ուկրաինայի հարավ-արևելքում անցկացված հանրաքվեների արդյունքներով։ ՌԴ ԱԳՆ ղեկավարը նաև նշել է, որ Մոսկվան պատրաստ է երկխոսության՝ ի տարբերություն մյուս արևմտյան երկրների։
Միևնույն ժամանակ Լավրովն ասել է, որ առայժմ չկան նշաններ, որ ԱՄՆ-ն նպատակադրված է ամրապնդել Ուկրաինայի հետ կապված մոտեցումներն արդեն Կիևի մասնակցությամբ և համոզել Եվրոպային չմիջամտել։
«Առայժմ չի երևում, որ ԱՄՆ-ն նպատակադրված է, որ այդ մոտեցումները, հատկապես մեր կողմից աջակցվողները, ամրագրվեն արդեն Ուկրաինայի մասնակցությամբ, և (ԱՄՆ-ն) համոզի Եվրոպային չմիջամտել», – նշել է նա։
