Բաքվում «Ադրբեջան» կինոթատրոնում հրաժարվել են ցուցադրել Август. Восьмогo ֆիլմը, որը պատմում է Հարավային Օսեթիայում 2008 թվականի պատերազմական գործողությունների մասին: Այս մասին հաղորդում է Vesti.az-ը:
«Ադրբեջան» կինոթատրոնի ներկայացուցիչները նշել են, որ ֆիլմը ցուցադրումից հրաժարվելու որոշում են ընդունել այն պատճառով, որ այն «ադրբեջանական հասարակության մեջ ոչ միանշանակ արձագանք է գտնում, իսկ վրացական հասարակությանն էլ մտահոգություն է պատճառում»:
Փետրվարի 16-ին ֆիլմի հանրային ցուցադրությունը չեղյալ հայտարարելու մասին հայտնել է նաև Բաքվի մեկ այլ` Park Cinema կինոթատրոնը: Միաժամանակ ադմինիստրացիան հայտնել է ԶԼՄ-ների համար «քննարկման նպատակով» փակ ցուցադրություն կազմակերպելու ծրագրերի մասին:
Август. Восьмогo ֆիլմի սյուժեն կառուցված է սիրային պատմության վրա, որը ծավալվում է Հարավային Օսեթիայում ռազմական գործողությունների ֆոնին: Ֆիլմի համաշխարհային պրեմիերան նշանակված է փետրվարի 21-ին: Ֆիլմը նկարահանել է ռուս ռեժիսոր Ջանիկ Ֆայզիևը։
Հիշեցնենք, որ զինված հակամարտությունը Հարավային Օսեթիայում տեղի ունեցավ 2008 թվականի օգոստոսին: Դրա արդյունքում Վրաստանն ամբողջությամբ կորցրեց վերահսկողությունը տարածքի նկատմամբ, իսկ Մոսկվան էլ պաշտոնապես ճանաչեց Հարավային Օսեթիայի անկախությունը:
