Փաստորեն, հայկական գյուղը սկսել է մեծ հաջողություն վայելել դրսում: Հայաստանում սկսել է ձևավորվել նոր, բավականին հեռանկարային ու խոստումնալից «գյուղական տուրիզմ» հասկացությունը. Հայաստանի համար նոր ու յուրատեսակ զբոսաշրջային փաթեթը վերջին շրջանում հայկական գյուղ է բերում զբոսաշրջիկների զգալի հատված: ՀՀ էկոնոմիկայի նախարարության զբոսաշրջության և տարածքային տնտեսական զարգացման վարչության պետ Մեխակ Ապրեսյանի համոզմամբ, Հայաստանի համար դեռևս նոր այս փաթեթը մեծ հետաքրքրություն է ներկայացնում, ինչին նպաստում են Հայաստանի պատմամշակութային հարուստ ժառանգությունն ու ավանդույթները, ինչպես նաև այն հանգամանքը, որ մեր պատմամշակութային հուշարձանները մեծամասամբ մարզերում ու գյուղական բնակավայրերում են գտնվում, սակայն օտարերկրյա զբոսաշրջիկին, առավել քան նշվածները, սկսել է հետաքրքրել հայկական գյուղը` հայ գյուղացու առօրյայով ու ապրելակերպով: Զբոսաշրջիկին, բացի ճանաչողական նպատակներից և այլ գրավիչ վայրերից, ժամանակի հետ ավելի է հետաքրքրում տեղի բնակչության հետ կյանքի փորձը կիսելը, շփումը, ավանդույթներին ծանոթանալը, անմիջական մասնակցությունը գյուղական միջոցառումներին ու համայնքային մշակույթին, իսկ Հայաստանն այս առումով բավական գրավիչ է` սկսած լավաշ թխելուց, օղու թորումից մինչև Վարդավառ: Հայաստանում գյուղական տուրիզմի զարգացմանն աջակցում է նաև «Միասին» հիմնադրամը` կատարելով այս բնագավառում ամենակարևոր քայլերից մեկը` «Հայաստանի զբոսաշրջային տների ասոցիացիայի» ստեղծումը: «Ամբողջ Հայաստանի տարածքում մենք մոտ 100 զբոսաշրջային տներ ենք գտել, որոնք արդեն զբաղվում են այդ բիզնեսով և համապատասխանում են նախատեսված չափանիշներին, կարող են իրենց հյուրին հետաքրքիր օր առաջարկել: Նրանց արդեն մենք սկսեցինք օգնել` կապ հաստատելու արտասահմանցի զբոսաշրջիկների հետ, ապահովելու լեզվական շփումը, որ հիմնական խնդիրն է այս գործընթացում»,- նշեց «Միասին» հիմնադրամի հայաստանյան գրասենյակի տնօրեն Սոնա Հակոբյանը: Հիմնադրամը ստեղծել է նաև ինտերնետային կայք (www.tourisme-solidaire-armenie.org), որն ունի ուղիղ կապով (online) պատվիրելու հնարավորություն: Այստեղ նկարներով ներկայացվում են բոլոր տները, յուրաքանչյուրի դեպքում նշվում է, թե տարածքում ինչ տեսարժան վայրեր կան և կարևոր հանգամանքներից մեկը` ինչ ծառայություններ կարող է մատուցել: Ներկայումս նման զբոսաշրջային տները մեծ թիվ են կազմում Դիլիջանում, Իջևանում, Գորիսում, Լոռիում և Գյումրիում, իսկ զբոսաշրջիկները, որոնք հիացած են հայկական գյուղերով, հիմնականում Ֆրանսիայից, Շվեյցարիայից ու Բելգիայից են, թեև կան նաև գերմանացիներ ու իտալացիներ:
