Արմավիրի մարզի ընդհանուր իրավասության առաջին ատյանի դատարանում երեկ մեկնարկեց «Արմավիր բժշկական կենտրոն» ՓԲԸ-ի տնօրեն Նշան Գևորգյանի վերաբերյալ քրեական գործով դատավարությունը:
Արմավիրի մարզի դատախազությունը հաստատել է մեղադրական եզրակացությունը, և քրեական գործը՝ մեղադրական եզրակացությամբ, արդեն քննվում է Արմավիրի մարզի ընդհանուր իրավասության դատարանում:
Դատավարության կողմերից ՀՀ Արմավիրի մարզի դատախազությունը դատարանում ներկայացնում է դատախազ Արմեն Գաբրիելյանը, դատարանում են նաև տուժողի իրավահաջորդներ Արմեն Խլղաթյանը, Անահիտ Հովհաննիսյանը և Սայադ Սեդրակյանը:
Նշենք, որ բժշկական կենտրոնի տնօրենին մեղադրանք է առաջադրվել այն բանի համար, որ որ նա հանդիսանալով «Արմավիր բժշկական կենտրոն» ՓԲԸ տնօրեն, բժշկական օգնության և սպասարկման կազմակերպման իր մասնագիտական պարտականությունները պատշաճ չի կատարել, որն անզգուշությամբ առաջացրել է մարդու մահ: 2010 թ. հուլիսի 17-ին, ժամը 22-ի սահմաններում, իմանալով նույն օրը, ժամը 17:05-ին «Արմավիր» ԲԿ ընդունված մանկահասակ հիվանդ Հովհաննես Համլետի Հովհաննիսյանի առողջական վիճակի վատացման մասին, Երևանի «Սուրբ Աստվածամայր» ԲԿ հիվանդի տեղափոխման համար մանկական ռեանիմացիոն խումբ և ռեանիմոբիլ հրավիրելու փոխարեն անթույլատրելի կերպով հիվանդի տեղափոխումը կազմակերպել է տաքսի ավտոմեքենայով, որի հետևանքով հիվանդանոց տեղափոխելու ճանապարհին Հ. Հովհաննիսյանը մահացել է: Այսինքն` Նշան Գևորգյանը կատարել է հանցանք նախատեսված ՀՀ քր.օր.-ի 130 հոդվածի 2-րդ մասով:
Դրանից հետո որպես պաշտոնատար անձ շարունակելով ծառայության նկատմամբ անբարեխիղճ և անփույթ վերաբերմունքը՝ իր պարտականությունները կատարել է ոչ պատշաճ, ընկերության շտապօգնության ծառայության աշխատանքները ճիշտ չկազմակերպելով ավտոմեքենաներին բավարար քանակությամբ վառելանյութ չի տրամադրել, որի արդյունքում 2010 թ. դեկտեմբերի 4-ի լույս 5-ի գիշերը շտապօգնության ծառայության հերթապահ խումբը բենզին չունենալու պատճառաբանությամբ Արմավիրի մարզի Այգևան գյուղի բնակիչ Վռամ Սարգսի Խլղաթյանի հարազատների ժամը 00:46-ի հեռախոսականչով, հիվանդ Վ. Խլղաթյանի առողջական վիճակին սպառնացող վտանգի պարագայում, նրան չի այցելել և շտապ բժշկական օգնություն չի ցուցաբերել, որի հետևանքով հիվանդը մահացել է: Այսինքն` այս դեպքում Նշան Գևորգյանը կատարել է հանցանք նախատեսված ՀՀ քր.օր.-ի 315 հոդվածի 2-րդ մասով:
Բացի դա, Նշան Գևորգյանն ի պաշտոնե անփույթ վերաբերմունքի դրսևորմամբ բժշկական կենտրոնի աշխատակիցների պահանջների պայմաններում ԲԿ-ն չի ապահովել մանկական լարինգոսկոպով և մանկական վերակենդանացման համար անհրաժեշտ բժշկական պարագաներով, ու երբ 01.01.2011 թ. Արմավիրի ԲԿ մանկական բաժանմունք ընդունված մանկահասակ հիվանդ Արտաշես Սայադի Սեդրակյանի առողջական վիճակը կտրուկ վատացել է, բուժօգնություն ցուցաբերելու լիարժեք հնարավորություն չեն ունեցել, որը ևս որպես Ն. Գևորգյանի կողմից թույլ տրված կազմակերպչական բնույթի թերություն անզգուշորեն առաջացրել է հիվանդի մահը: Մեղադրողը հաստատել է, որ այս դեպքում էլ բժշկական կենտրոնի տնօրենը կատարել է հանցանք նախատեսված ՀՀ քր.օր.-ի 130 հոդվածի 2-րդ մասով:
