Ռուսական Интерфакс լրատվական գործակալության փոխանցմամբ՝ ԱՄՆ պետդեպարտամենտի մամլո քարտուղար Ալան Էյրը հայտարարել է, որ Իրանը պետք է համոզի միջազգային հանրությանը, որպեսզի վերջ դնի իր միջուկային ծրագրի ռազմական բնույթ կրելու հետ կապված մտահոգություններին:
Նա հավելել է, որ Իրանը պետք է պահպանի միջուկային զենքի չտարածման մասին պայմանագրով ստանձնած իր պարտավորությունները:
Իսկ ԱՄՆ պետդեպարտամենտի պաշտոնական ներկայացուցիչ Վիկտորյա Նուլանդն իր հերթին ճեպազրույցի ժամանակ հայտարարել է, որ ԱՄՆ-ը դեռ չի կողմնորոշվել «վեցյակ»-ի հետ բանակցությունները վերսկսելու պատրաստակամությանն առնչվող Իրանի նամակին արձագանքելու հարցում:
Նա հավելել է, որ ներկայումս իրենք ուսումնասիրում են 196 բառից բաղկացած այդ նամակը և սկզբի համար ցանկանում են իրենց դիրքորոշումը կոորդինացնել իրենց գործընկերների հետ:
Հիշեցնենք, որ Իրանի այդ նամակը պատասխան է Իրանի ղեկավարությանն՝ ուղղված ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնի նամակին, որում առաջարկվում էր «վեցյակ»-ի հետ վերսկսել Իրանի միջուկային ծրագրի շուրջ բանակցությունները:
