Փետրվարի 15-ին, ժամը 23.35-ին, ոստիկանության Արտաշատի բաժնում ահազանգ է ստացվել, որ Գետազատ գյուղում վիճաբանություն է տեղի ունենում:
Դեպքի վայր մեկնած օպերատիվ խումբը պարզել է, որ նույն օրը, ժամը 22.30-ի սահմաններում, «Կյաժ» մականունով ոմն Վահրամ, «Չախկալ» մականունով ոմն Կարեն, Ծերուն, Սարո, Տիգրան և Արամ շուրջ 20 րոպե վիճաբանել ու հայհոյել են` ծեծի ենթարկելով համագյուղացիներ` 1986 թ. ծնված Սամվել Հ.-ին, 1980 թ. ծնված Վաչագան Հ.-ին, 1980 թ. ծնված Արտյոմ Ա.-ին և 1978 թ. ծնված Դավիթ Ե.-ին: Միջադեպի ընթացքում Ծերունը մեկ անգամ կրակել է օդ:
Ավելի ուշ ոստիկանությունը պարզել էր, որ «Կյաժը» 1985 թ. ծնված Վահրամ Ա.-ն է, «Չախկալը»` 1979 թ. ծնված Կարեն Ա.-ն, վիճաբանության մյուս մասնակիցներն են՝ 1986 թ. ծնված Ծերուն Ս.-ն է, 1981 թ. ծնված Սարիբեկ Հ.-ն, 1990 թ. ծնված Տիգրան Ս.-ն, 1992 թ. ծնված Արամ Ա.-ն:
Փետրվարի 16-ին, ժամը 12.00-ին, Տիգրան Ս.-ն բերման է ենթարկվել բաժին և ներկայացվել ոստիկանության Արարատի մարզային քննչական բաժին: Ձեռնարկվում են միջոցառումներ Վահրամ Ա.-ին, Կարեն Ա.-ին, Ծերուն Ս.-ին, Սարիբեկ Հ.-ին և Արամ Ա.-ին հայտնաբերելու ուղղությամբ:
«Առաջին լրատվական»–ի տեղեկություններով` այս միջադեպը կապված է գյուղապետի` առաջիկայում սպասվելիք ընտրությունների հետ: Վեճի մի կողմում գյուղապետի ներկայիս պաշտոնակատար Մեսրոպի և նրա մտերիմ Գորոյի տղաներն են` Սամվել և Վաչագան Հովհաննիսյանները, մյուս կողմում` «Կյաժն»՝ իր համախոհների հետ, որոնք էլ սկսել են վեճը: Մեզ հասած տեղեկություններով՝ այս գյուղի արդեն նախկին գյուղապետ Սամվել Վարդանյանը (մականունը` Ճյակո) կասկածվում է պաշտոնեական դիրքի չարաշահման մեջ և արդեն 1-2 ամիս է, որ գտնվում է անազատության մեջ:
Ի դեպ, այս գյուղի մեկ այլ գյուղապետի` Ճարպիկ Վարդանյանի հետ կապ կապված մի միջադեպ էլ եղել էր 2005-ի մայիսին։ Գետազատ գյուղի մանկապարտեզի վարիչ Ցողիկ Գ.-ն ոստիկանությանը հայտնել էր, որ գյուղապետի աշխատասենյակում ծագած վիճաբանության ժամանակ իրեն ծեծի է ենթարկել գյուղապետ Ճարպիկ Վ.-ն: Վերջինիս լիազորությունները 2008-ին վաղաժամկետ դադարեցվել էին. նա հրաժարվել էր իր պաշտոնից սեփական դիմումի համաձայն:
