Ինչպես հաղորդում է Интерфакс գործակալությունը, Մոսկվայում Սիրիայի դեսպանատան առջև ավելի քան 50 սիրիացիներ շնորհակալական ցույց են կազմակերպել՝ իրենց երախտագիտությունը հայտնելու Ռուսաստանին՝ Բաշար Ալ-Ասադի վարչակարգին պաշտպանելու համար:
Ակցիայի մասնակիցները բարձրաձայնել են հետևյալ կոչերը. «Շնորհակալությո՛ւն, Ռուսաստան. շնորհակալությո՛ւն, Մեդվեդև. շնորհակալությո՛ւն Պուտին», «Ռուսաստանի և Սիրիայի բարեկամությունը հավերժ է»:
Ցուցարարները, պահելով Ասադի դիմանկարները, վանկարկել են նրա անունը: Նրանք նաև պարել են ու երգել ազգային երգեր: Ցույցը տևել է մոտ մեկ ժամ:
Ցույցը կազմակերպվել էր, այսպես կոչված, Սիրիայի և Լիբիայի ժողովուրդների համերաշխության կոմիտեի կողմից: Կոմիտեն ստեղծվել է 2011 թ. գարնանը՝ Համազգային ռուսական միության նախագահ Սերգեյ Բաբուրինի, Ռուսաստանի իսլամական կոմիտեի ղեկավար Հեյդար Ջեմալեի և մի շարք այլ քաղաքական գործիչների նախաձեռնությամբ:
