Մաշտոցի պուրակում տեղադրվող կրպակները ժամանակավոր բնույթ են կրում: «Առաջին լրատվական»-ի հետ զրույցում նման տեսակետ հայտնեց ՀՀ ճարտարապետների միության նախագահ Մկրտիչ Մինասյանը`խոսելով Մաշտոցի պուրակում կրպակների տեղադրման շուրջ առաջացած բողոքի ալիքի շուրջ:
Նա նշեց, որ գիտի, որ այդ կրպակները Աբովյան փողոցն ազատագրելու հետ են կապված: Ըստ նրա` կրպակներ տեղադրելը բավական դժվար գործընթաց էր, և Գլխավոր պողոտայի հետագա վերակառուցման ծրագրի իրականացմանը զուգահեռ դրանք դուրս կգան: «Եթե Աբովյան փողոցում դրանք դրվել էին որպես հիմնական, այստեղ դրանք կրում են ժամանակավոր բնույթ: ինձ թվում է՝ դա այդպես էլ կլինի: Չի կարող պատահի դրանք երկար կյանք ունենան Գլխավոր պողոտայում»,- նշեց ճարտարապետը`հավելելով, որ այս դեպքում պետք է հավատալ քաղաքապետին, քանի որ մի քանի դեպք մեզ վստահելու առիթ տվել են: Նա ասաց, որ հավատացած է, որ դրանք ժամանակավոր կառույցներ են:
Խոսելով հասարակական վայրերում տաղավարների տեղադրման կարգից`նշեց, որ պուրակներում, իհարկե, ցանկալի չէ, որ լինեն տաղավարներ, սակայն ըստ նրա, երբ կա ստիպվածության հանգամանքը, ինչ-որ մի կերպ դրանք պետք է ժամանակավորապես տեղավորվեն մի տեղ, քանի որ դրանք պետք է լինեին Աբովյան փողոցում:
Ճարտարապետի համոզմամբ` դրանք տեղադրվում են Գլխավոր պողոտայում մինչև ամբողջական տեսքի բերվելը:
Անդրադառնալով Երևանի գլխավոր ճարտարապետի ներկայացրած «Հին Երևան» նախագծին`ասաց, որ ծրագիրը մշակումների փուլում է: Մկրտիչ Մինասյանի խոսքով` «Հին Երևան» ծրագիրը ստիպված քայլ է: «Եթե հուշարձաններն իրենց հիմնական տեղերից պոկվում և գնում են մի տեղ են հավաքվում, իրենց արժեքը կիսով չափ կորցնում են: Այդ պատառիկը փորձում են պահել, որ մնա Երևանի համար»,- եզրափակեց Ճարտարապետների միության նախագահ Մկրտիչ Մինասյանը:
