Ոստիկանության ուղեցույցները ներքին կարգավորման համար են: Այսօր «Առաջին լրատվական»-ի հետ զրույցում նման տեսակետ հայտնեց ՍԴՀԿ անդամ, ԱԱ նախկին փոխնախարար Գուրգեն Եղիազարյանը`խոսելով ոստիկանության ուղեցույցի մասին:
Նա նշեց, որ ուղեցույցները ներքին կարգավորման համար են: Ըստ նրա` անհրաժեշտ է այդ ամենը կարգավորել օրենքով: «Ո՞վ է որոշում, թե ե՞րբ կամ ո՞ր դեպքերում է ամբոխն անվերահսկելի դառնում: Ո՞վ կարող է որոշել, թե որ իրավիճակն է անվերահսկելի և որը`ոչ: Կա՞ որևէ մեկը, ով կարող է բանաձևել դա: Օրենքի մեջ պետք է փոփոխություն մտցվի, իսկ օրենքը պետք է գնա ԱԺ և ԱԺ-ում ստանա իրավական գնահատական: Եթե ուղեցույցը համահունչ է օրենքին, ապա ես մեկնաբանություն չունեմ, իսկ եթե համահունչ չէ, ծիծաղելի է»,- եզրափակեց Գ. Եղիազարյան:
Հիշեցնենք, որ Հայաստանի ոստիկանությունը ԵԱՀԿ երևանյան գրասենյակի աջակցությամբ մշակել և հաստատել է զանգվածային անկարգությունների ժամանակ ոստիկանության կողմից ֆիզիկական ուժի, հատուկ միջոցների և զենքի գործադրման մասին ուղեցույց: Այն ոստիկաններին բացատրում է, թե որն է զանգվածային անկարգությունը, ինչ է ուժի գործադրումը, որոնք են հատուկ միջոցները:
Ըստ ուղեցույցի՝ հատուկ միջոցներ կարող են կիրառվել այն դեպքում, երբ ամբոխի վարքագիծը դուրս է գալիս վերահսկողությունից: Հատուկ միջոցներն են ձեռնաշղթան, ռետինե մահակը, էլկտրահարող սարքերը, կայծային պարպիչները, գազային ատրճանակները, գազային և լուսաձայնային նռնակները, ռետինե գնդակներով փամփուշտները, ջրնետ մեքենաները, շները և այլն:
