ՀՀ նախկին արտգործնախարար Վարդան Օսկանյանի՝ մեծ քաղաքականություն վերադարձն ինչ-որ տեղ 2007 թվականի նրա ցանկության շարունակությունն է ՝ ԲՀԿ-ն օգտագործել մեխանիզմ՝ նախագահական ընտրություններին մասնակցելու համար: «Առաջին լրատվական»-ի հետ զրույցում նման տեսակետ հայտնեց փորձագետ Մանվել Սարգսյանը:
«Դեռ այն ժամանակ էր խոսվում և շոշափվում Օսկանյանի՝ նախագահական ընտրություններին մասնակցելու, անգամ Ռոբերտ Քոչարյանի՝ վարչապետ մնալու մասին, սակայն ամեն բան այլ կերպ ստացվեց: Հիմա այնպիսի տպավորություն է, որ մարդիկ հիշել են անցյալը և ուզում են նույնը երկրորդ անգամ փորձել: Կարծում եմ՝ դրա մեջ ինչ-որ իմաստ կա, այլապես Օսկանյանի՝ ԲՀԿ-ին անդամակցելու դիմում գրելուն այլ բացատրություն տալը դժվար է: Նախկին ԱԳ նախարարի վերադարձի նպատակն իշխանության համար պայքարն է, այժմ խորհրդարանական, հետագայում նախագահական ընտրություններին նախապատրաստվելը»,- ասաց Մանվել Սարգսյանը:
Հարցին՝ արդյոք Ռոբերտ Քոչարյանի վերադարձով հենց ՀՀԿ ներսում չե՞ն թուլանա Սերժ Սարգսյանի դիրքերը, փորձագետը նկատեց. «Այդ ամենը, բնական է, լինում է, ուղղակի այս պահին բավական դժվար է գնահատել՝ որքան մեծ է Քոչարյանի դերն իշխանական համակարգում»:
Հիշեցնենք՝ երեկ հայտնի դարձավ, որ «Սիվիլիթաս» հիմնադրամի խորհրդի նախագահ Վարդան Օսկանյանը ԲՀԿ-ին անդամակցելու դիմում է ներկայացրել՝ հիմնավորելով, որ երկրի քաղաքական գործընթացներին իր ավելի ակտիվ մասնակցության ժամանակն է, և համոզմունք հայտնելով, որ «Բարգավաճ Հայաստանը» այլ քաղաքական ուժերի հետ կարող է քաղաքական մրցակցության շնորհիվ ապահովել ազատ և արդար ընտրություններ:
