ՄԱԿ-ի Գլխավոր ասամբլեայում մտցվել է Սիրիայի դեմ նոր բանաձև: Այս մասին հաղորդում է Agence France-Presse-ը՝ վկայակոչելով դիվանագիտական շրջանակների աղբյուրները:
Բանաձևի տեքստը պատրաստվել է Սաուդյան Արաբիայի և Կատարի կողմից ու ներկայացվել Գլխավոր ասամբլեային: Դրա քվեարկությունը տեղի կունենա փետրվարի 16-ին:
Փաստաթուղթը կոչ է անում Սիրիայի նախագահ Բաշար Ալ-Ասադին դադրեցնել բռնությունները հակակառավարական ցույցի մասնակիցների նկատմամբ և հրաժարական տալ: Բացի այդ, փաստաթղթի հեղինակները առաջարկում են Սիրիա ուղարկել ՄԱԿ-ի հատուկ դեսպանի:
Գործակալության զրուցակիցը նշել է, որ բանաձևի նախագիծը մի շարք կետերով կրկնում է Արաբական պետությունների լիգայի՝ Սիրիայի խաղաղ կարգավորմանն ուղղված ծրագիրը, սակայն նոր փաստաթուղթը բաց է թողնում Սիրիա խաղաղապահներ ուղարկելու ԱՊԼ նախաձեռնությունը:
Հիշեցնենք. փետրվարի 4-ին ՄԱԿ-ի Անվտանգության խորհրդում Ռուսաստանն ու Չինաստանն արգելափակեցին Սիրիայի դեմ ուղղված «անհավասարակշիռ» բանաձևը: Ակնկալվում է, որ Մոսկվան և Պեկինը դեմ հանդես կգան նաև այս փաստաթղթին, սակայն նրանք չեն կարող արգելափակել փաստաթղթի ընդունումը, քանի որ Գլխավոր ասամբլեայում ոչ մի պետություն վետոյի իրավունք չունի: Դիվանագետները կարծում են, որ փաստաթուղթը կընդունվի:
Սա ՄԱԿ-ի Գլխավոր ասամբլեայի առաջին բանաձևը չէ Սիրիայի վերաբերյալ: 2011 թ. դեկտեմբերի 19-ին ընդունվեց փաստաթուղթ, որը դատապարտում էր Սիրիայի իշխանությունների գործողությունները:
Սիրիայում հակակառավարական ցույցերը սկսվել են մոտ մեկ տարի առաջ, իսկ վերջին շրջանում դրանք ստացել են քաղաքացիական պատերազմի բնույթ: Մինչ այժմ, ՄԱԿ-ի վերջին տվյալներով, զոհվել է 5400 մարդ:
