Ռուսաստանի փոխարտգործնախարար Միխայիլ Բոգդանովը հայտարարել է, որ 2014 թվականին նախատեսված Սիրիայի նախագահի ընտրությունները կարելի էր ավելի շուտ անցկացնել:
«Այժմ նախագահի ընտրությունները նախատեսված են 2014 թվականին: Իմ անձնական կարծիքն է, որ նախագահ Ասադին կարելի էր խորհուրդ տալ արագացնել այդ ընտրությունները, սակայն դա սիրիացիների որոշումն է»,-ասել է նա Эхо Москвы ռադիոկայանի եթերում: Այս մասին հաղորդում է Интерфакс-ը:
Բոգդանովը հիշեցրել է, որ Սիրիայի նախագահական ըտրությունները, երբ էլ որ տեղի ունենան, պետք է նոր կանոներով անցկացվեն. այժմ քվեարկությունը պետք է անցկացվի այլընտրանքի հիման վրա, իսկ պետության ղեկավարը կարող է ընտրվել երկու անգամ` յոթ տարի ժամկետով:
«Ռուսական զենքը, հնարավոր է, հայտնվում է սիրիական ընդդիմադիրների ձեռքում: Այժմ կա հավաստի տեղեկություն այն մասին, որ ընդդիմադիր ուժերն օգտագործում են նռնականետեր, ականանետեր և այլ տեխնիկա: Գուցե նաև՝ մերը»,- հայտարարել է Բոգդանովը:
Խոսելով Բաշար Ասադի ռեժիմին ռուսական զինամթերքներով մատակարարման մասին՝ Բոգդանովն ընդգծել է, որ դա չի հակասում միջազգային իրավունքին:
«Ինչ վերաբերում է Սիրիայի հետ մեր ռազմատեխնիկական համագործակցությանը, ապա դրանք պայմանագրեր են, որոնք իրագործվում են, քանի որ մենք չենք խախտում մեզ վրա վերցրած միջազգային պարտականությունները»,- նշել է դիվանագետը: Նրա խոսքերով՝ Ռուսաստանը Սիրիային մատակարարում է բացառապես պաշտպանական զինամթերք:
Նա նաև նշել է, որ Ռուսաստանի ներկայացուցիչները կարող են ներգրավվել խաղաղապահ առաքելության մեջ: «Անհրաժեշտ է, որպեսզի պահպանվեն ՄԱԿ-ի կանոնադրության սկզբունքները: Եթե հաջողվի պայմանավորվել Դամասկոսի հետ, ապա մեր խաղաղապահները կարող են մասնակցել առաքելությանը»,-հայտարարել է Բոգդանովը: Նա նշել է, որ «այժմ Մոսկվան Սիրիայի հարցով խորհրդատվություններ է անցկացնում իր բոլոր գործընկերների հետ»: Գլխավոր նպատակը Դամասկոսին օգնելն է, որպեսզի դուրս գա ստեղծված իրավիճակից»,-ասել է նա:
