«Գործնական շփման համար LinkedIn սոցիալական ցանցի օգտատերերի թիվը հասել է 150 միլիոնի»,– եռամսյակային ֆինանսական հաշվետվության ընթացքում հայտնել է ընկերությունը:
2011 թվականի նոյեմբերից սոցցանցի լսարանը աճել է 20 միլիոն օգտատերով: Չնայած մրցակցությանը` մի կողմից՝ արագ զարգացող Google+–ի և մյուս կողմից՝ շուկայի առաջատար Facebook–ի գոյությանը, LinkedIn-ը կարողացավ գտնել իր տեղը սոցիալական ինտերնետ-ռեսուրսների մեջ:
Facebook-ի լսարանը վերջին տվյալներով ավելի քան 850 միլիոն է, իսկ Google+-ի օգտատերերի թիվը մոտենում է 100 միլիոնին:
Չորրորդ եռամսյակի տվյալներով՝ սոցիալական ցանցը հայտնել է մաքուր շահույթի 30 % աճի` մինչև 6.9 միլիոն դոլար և եկամտի ավելի քան 100 % աճի մասին` մինչև 167.7 միլիոն դոլար` համեմատելով անցած տարվա նույն ժամանակահատվածի հետ:
Անցած եռամսյակի ընթացքում LinkedIn-ն ավարտեց ծրագրերի ապահովման մշակման դեպարտամենտի վերակազմակերպումը, որի նպատակն էր 2012 թվականին ստեղծել ինովացիաների բազա:
Բացի այդ, սոցցանցն ԱՄՆ-ի սահմաններից դուրս` Ճապոնիայում, Հնդկաստանում և Բրազիլիայում, բացել է երեք նոր գրասենյակ: Նաև հնարավորություն է ստեղծել ինտերֆեյսը թարգմանել ևս 5 լեզվով` ներառելով ճապոներենը, շվեդերենը, ինդոնեզերենը, մալայերենը և կորեերենը:
LinkedIn ընկերությունն իր բաժնետոմսերն առաջին անգամ հրապարակային տեղադրել է 2011 թվականի մայիսին` Նյու Յորքի ֆոնդային բորսայում: Այդ օրվանից ի վեր նրա բաժնետոմսերի գինը չի ընկել:
Հինգշաբթի օրը նյույորքյան ֆոնդային բորսայի փակման ժամանակ ընկերության բաժնետոմսերը 76.4 դոլար են կազմել: Այս մասին հաղորդում է korrespondent.net-ը: