Հայկ Գևորգյանի կալանավորմամբ ոստիկանությունը խայտառակեց իրեն: «Առաջին լրատվական»-ի հետ զրույցում նման տեսակետ հայտնեց «Հայացք» օրաթերթի գլխավոր խմբագիր Աշոտ Աղաբաբյանը`անդրադառնալով «Հայկական ժամանակ» օրաթերթի թողարկման պատասխանատու Հայկ Գևորգյանի կալանավորմանը:
Ըստ նրա, աա խոսքի ազատության դեմ ուղղված քայլ է, Հայկը հանցագործ չէ, որ բռնեն և ձերբակալեն: «Պարզապես շատ լկտի ձևով խոսքի ազատության սահմանափակման փորձ է Հայկի կալանավորումը: Սա կոնկրետ մարդու գործունեության դեմ է ուղղված: Հայկը հրաշալի մարդ է և շատ լավ լրագրող: Նրան պարզապես չեն կարողանա երկար պահել»,- ասաց Աշոտ Աղաբաբյանը`հավելելով, որ միասնական պետք է պայքարել, որ «երկրորդ Հայկին» չձերբակալեն:
«Հայացք» օրաթերթի գլխավոր խմբագրի կարծիքով` այս քայլով ոստիկանությունն առաջին հերթին ինքն իրեն խայտառակեց իր պրիմիտիվ գործելակերպով: «Սովետական ժամանակաշրջանն են հիշեցնում Վովա Գասպարյանի գործողությունները»,- եզրափակեց Աշոտ Աղաբաբյանը:
Հիշեցնենք, որ երեկ կալանավորվել է հայտնի լրագրող, «Հայկական ժամանակ» օրաթերթի թողարկման պատասխանատու Հայկ Գևորգյանը:
