Ադրբեջանական Salam News գործակալությանը տված հարցազրույցում թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուն անդրադարձել է հունվարի 23-ին Ֆրանսիայի Սենատի կողմից Հայոց ցեղասպանության հերքումը քրեականացնող օրինագծի ընդունմանն ու ղարաբաղյան հակամարտության կարգավորմանը.
«Ֆրանսիայի Սենատը պետք է ուղղի իր սխալը: Այդ որոշումը հակասում է ազատության և ժողովրդավարության սկզբունքներին: Ներկայումս մենք սպասում ենք Ֆրանսիայի Սահմանադրական խորհրդի որոշմանը: Մենք արդյունք ենք ակնկալում և հուսով ենք, որ չեղյալ կհայտարարվի այդ օրինագիծը: Ֆրանսիացի սենատորները չպետք է զբաղվեն օտարների պատմությամբ: Թուրքիայի հետագա քայլերը կբխեն Ֆրանսիայի Սահմանադրական խորհրդի կողմից համապատասխան որոշում կայացնելուց հետո:
Թուրքիայում իշխող «Արդարություն և զարգացում» կուսակցությունը (ԱԶԿ) պետք է ավելի մեծ ուշադրություն հատկացնի ղարաբաղյան հակամարտության կարգավորմանը, չնայած Թուրքիան ներառված չէ ԵԱՀԿ Մինսկի խմբի կազմում: Այդ խնդրի կարգավորման հարցում ցայժմ ձեռք չի բերվել լուրջ առաջընթաց:
Սակայն ԱԶԿ-ն, մեր ադրբեջանցի եղբայրներին օգնելու փոխարեն, զբաղված է իր գործերով: Թուրքիան պետք է ինտենսիվացնի Ռուսաստանի ու ԱՄՆ-ի հետ բանակցությունները՝ ղարաբաղյան հակամարտության կարգավորման ուղղությամբ ջանքերի ակտիվացման համար: Երևանի հանդեպ ԱԶԿ-ն պետք է որդեգրի հետևողական դիրքորոշում»:
