«Առավոտ» օրաթերթի խմբագիր Արամ Աբրահամյանը համոզված է, որ «Հայկական ժամանակի» լրագրող Հայկ Գևորգյանի կալանքը «սարքած գործ» է: Այս մասին նա ասաց «Առաջին լրատվական»-ի հետ զրույցում:
«Վստահ չեմ, թե ինչի համար է նա կալանավորվել, բայց հարյուր տոկոսով վստահ եմ, որ ոստիկանները, իրենց սովորության համաձայն, գործ են սարքում: Հիմա չեմ կարող ասել ոստիկանների մոտիվները, թե ինչի համար են իրենք գործ սարքել, որովհետև առանց որևէ քաղաքականության՝ նրանք գործ սարքում են նաև պարզապես կաշառք վերցնելու համար: Բայց որ սա սարքովի դեպք է և որևէ տրամաբանության ենթակա չէ՝ հաստատ է: Միաժամանակ, չեմ բացառում, որ դեպքը կարող է կապված լինել նախընտրական շրջանի հետ»,- ասաց Արամ Աբրահամյանը:
Հարցին՝ եթե լրագրողական հանրույթն ի պաշտպանություն Հայկ Գևորգյանի հայտարարություն տարածի, ինքը պատրա՞ստ է ստորագրել դրա տակ, «Առավոտի» խմբագիրն ասաց. «Նայած, թե ինչ տեքստ կլինի. եթե, օրինակ, լինի «Ավազակապետությունն ապրում է իր վերջին օրերը» կամ սրա նման քաղաքական ենթատեքստով մեկ այլ հայտարարություն, բնականաբար չեմ ստորագրի, բայց եթե պարզապես Հայկին պաշտպանելու տեքստ լինի, կստորագրեմ»:
Հիշեցնենք, որ ոստիկանության աշխատակիցները Գևորգյանին երեկ առավոտյան ժամը 11-ի սահմաններում նախ բերման են ենթարկել ոստիկանության Կենտրոնի բաժին, այնուհետև նրան կալանավորել են և տեղափոխել «Նուբարաշեն» ՔԿՀ, որտեղ էլ նա պահվում է:
