Քանի դեռ իրավապահ մարմինները «Հայկական ժամանակ» օրաթերթի թողարկման պատասխանատու Հայկ Գևորգյանի կալանքի մասին կոնկրետ գնահատական չեն տվել, կատարված դեպքը քաղաքականացնել պետք չէ: «Առաջին լրատվական»-ի հետ զրույցում նման տեսակետ հայտնեց ՀՀ ԱԺ ՀՀԿ խմբակցության անդամ Հովհաննես Սահակյանը:
«Ավելի կտրուկ և վերջնական մեկնաբանություններից զերծ կմնամ, ընդամենը կասեմ, որ պետք չէ կանխավ ճնշումներ գործադրել իրավապահ մարմինների վրա և հարցը քաղաքականացնել, կապել գալիք ընտրությունների հետ: Կոչ կանեի, որ բոլորը զերծ մնային գնահատականներ հնչեցնելուց, քանի դեռ իրավապահները եղելությունը չեն պարզել»,- ասաց Հովհաննես Սահակյանը:
Հիշեցնենք, որ այսօր տանից դուրս գալու պահին քաղաքացիական հագուստով անձինք, ոլորելով «Հայկական ժամանակ» օրաթերթի թողարկման պատասխանատու Հայկ Գևորգյանի ձեռքերը, նրան տարել են անհայտ ուղղությամբ։ Ոստիկանության հաղորդմամբ՝ Հայկ Գևորգյանը հունվարի 23-ից իբր գտնվել է հետախուզման մեջ՝ ինչ-որ քաղաքացու վրաերթի ենթարկելու կասկածանքով: Հայկ Գևորգյանն այժմ պահվում է «Նուբարաշեն» ՔԿՀ-ում:
