«Հայաստան» համահայկական հիմնադրամը Գյումրիի «Երեխաների տուն» մանկատան հիմնանորոգումն իրականացնելու է «Հեռախոսամարաթոն-2011»-ի շրջանակում գերմանահայ համայնքի նվիրաբերած միջոցներով:
Այս մասին «Առաջին լրատվական»-ին տեղեկացնում են «Հայաստան» համահայկական հիմնադրամից։
Մանկատան շենքը կառուցվել է 1924թ. և մինչև 1972թ. գործել է որպես գիշերօթիկ մանկապարտեզ: 1946 և 1993թթ. կառուցվել է երկու մասնաշենք ևս: Հիմնադրամը նախաձեռնել է երեք մասնաշենքերից երկուսի վերանորոգումը (ընդհանուրը` 900քմ մակերես տարածք): Ծրագրի շրջանակներում կբարեկարգվեն ննջարանները, մարմնամարզության դահլիճը, ճաշարանը, խոհանոցը, սանհանգույցները, կտեղադրվեն օդափոխության և հակահրդեհային համակարգեր: Տարածքն առավելագույնս կհամապատասխանեցվի հաստատության կարիքներին:
Մանկատանը խնամք է ստանում մտավոր և ֆիզիկական շեղումներ ունեցող մինչև 6 տարեկան ավելի քան 120 երեխա: 6 տարեկանը լրանալուց հետո մանկատան սաները տեղափոխվում են դեռահասների համար նախատեսված մանկատներ, այդ թվում` Խարբերդի մասնագիտացված և Երևանի Մարի Իզմիրլյանի անվան մանկատներ:
Երեխաներին տեղաբաշխելիս հաշվի են առնվում երեխաների մտավոր և ֆիզիկական վիճակը, ինչպես նաև նրանց վիճակի բարելավման հնարավորությունները:
Օրինակ՝ տեսողական խնդիրներ ունեցող երեխաներն էլ տեղափոխվում են ապրելու և ուսանելու Երևանի` տեսողական խնդիրներ ունեցող երեխաների թիվ 14 գիշերօթիկ դպրոցում: Իսկ այն երեխաները, որոնց վիճակը զգալիորեն բարելավվում է, անհրաժեշտ բժշկական միջամտությունից հետո, ծնողների ցանկությամբ երբեմն վերադառնում են ընտանիք:
«Խնդիրներն օրեցօր ավելանում էին: Կոյուղագծերն ու ջրագծերը քայքայվել էին: Դրանց մաշվածության պատճառով սանհանգույցներն ավելի ու ավելի հաճախ էին անօգտագործելի դառնում, իսկ պատերը խոնավությունից քայքայվել էին: Շենքի օդափոխության համակարգը վաղուց արդեն չէր գործում, մի բան, որ անընդունելի է առողջական ամենատարբեր խնդիրներ ունեցող երեխաների համար»,- պատմել է մանկատան տնօրեն Ռուզաննա Ավագյանը:
«Մեր ցանկությունն է, որ հայ մանուկները լինեն առողջ ու ապրեն լիարժեք կյանքով: Իսկ եթե կան երեխաներ, որոնք խնդիրներ ունեն, պետք է անենք հնարավորը, որ նրանց կյանքը լինի հնարավորինս լուսավոր ու իմաստալից»,- ասել է հիմնադրամի Գերմանիայի տեղական մարմնի ատենապետ Ժիլբեր Մոմջյանը:
