Ադրբեջանական APA լրատվական գործակալության փոխանցմամբ՝ Ադրբեջանը 300 միլիոն եվրո վարկ է տրամադրել Սերբիային՝ 15 տարի ժամկետով: Համապատասխան համաձայնագիրը ստորագրել են Բաքվում գտնվող Սերբիայի արտգործնախարար Վուկ Երեմիչը և Ադրբեջանի տնտեսական զարգացման նախարար Շահին Մուստաֆաևը:
Երեմիչը հայտարարել է, որ այդ գումարն ուղղվելու է ավտոճանապարհների, այդ թվում՝ նաև 60 կամուրջների ու 5 թունելների կառուցմանը: Նա հավելել է, որ ադրբեջանական կողմը շահագրգռվածություն է հայտնել ներդրումներ անել Սերբիայի գյուղատնտեսության ոլորտում և համագործակցել դեղագործական արդյունաբերության ոլորտում:
Հիշեցնենք, որ Ադրբեջանում Սերբիայի դեսպանատուն է բացվել նախորդ տարվա մարտին, իսկ առաջին դեսպանը (Զորան Վայովիչ) նշանակվել է մայիսի կեսերին: