BBC-ն, վկայակոչելով իրանական Press TV հեռուստաալիքը, հայտնում է, որ Իրանը տիեզերք է արձակել «Նավիդ» արբանյակը: Նշվում է, որ արբանյակը հանգրվանելու է ուղեծրի 250-370 կիլոմետրանոց հատվածում և ծառայելու է տարբեր նպատակների, այդ թվում՝ նաև գիտական. արբանյակը հետևելու է եղանակային երևույթներին և նախազգուշացնելու է բնական աղետների մասին:
Իրանի տիեզերական գործակալության ղեկավար Համիդ Ֆազելին հայտնել է, որ արբանյակի արձակումն ընթացել է առանց խնդիրների: Այլ մանրամասներ չեն հաղորդվում:
Հիշեցնենք, որ նախորդ տարվա նոյեմբերի կեսին Իրանի պաշտպանության նախարար, գեներալ Ահմադ Վահիդին հայտարարել էր, որ Իրանը սեփական արտադրության հրթիռակիրների օգնությամբ հայրենական արտադրության 3 նոր արբանյակներ է ուղարկելու տիեզերք։
Նա հավելել էր, որ «Ֆաջր», «Նավիդ» և «Տոլու» արբանյակներն ուղարկվելու են մինչև տարեվերջ (ավարտվում է 2012 թվականի մարտին և զբաղվելու են տիեզերքի հետազոտությամբ ու մասնավորապես տիեզերքի առաջացման գաղտնիքները պարզելով։
Վահիդին ընդգծել էր, որ Իրանը պլանավորել է մինչև 2020 թվականը մարդ գործուղել տիեզերք։
