Այսօր լրագրողների հետ հանդիպման ժամանակ ԼՂՀ ԱԳ նախկին նախարար Արման Մելիքյանը անդրադարձավ մեծամասնական և համամասնական ընտրակարգերի թեմային:
Ըստ նրա` այն պնդումները, թե 100 տոկոսանոց համամասնական ընտրակարգը կկանխի օլիգարխների մուտքը Ազգային ժողով, իրականությանը չի համապատասխանում:
«Գուցե ավելի նպատակահարմար է մի նոր սահմանադրական օրենք հռչակել: Այնպես է ներկայացվում, թե կան 41 ավազակ օլիգարխ և մի շարք սուրբ կուսակցություններ, որոնք օլիգարխներին դուրս մղելով՝ կկարողանան հավուր պատշաճի պաշտպանել ժողովրդի շահը: Մենք շատ լավ գիտենք և տեսնում ենք, որ ներկուսակցական ազատականությունը Հայաստանում շատ ցածր մակարդակի վրա է: Այդ մասին են փաստում անփոխարինելի կուսակցապետերը»,- նշեց Ա. Մելիքյանը`հավելելով, որ իր համար համարժեք չէ 40 օլիգարխի և Վիկտոր Դալլաքյանի փոխարինումը անդեմ և անհասկանալի զանգվածով:
Բանախոսի համոզմամբ` այս 41 մարդուն մեջտեղից հանելով՝ գործ կունենանք 7 կուսակցապետերի հետ: Նա չի գտնում, որ սա բխում է ընտրողի շահերից: Արման Մելիքյանը տեղեկացրեց, որ կողմ է խառը ընտրակարգին:
«Ես գտնում եմ, որ խառը ընտրակարգը պետք է պահպանվի, որովհետև այստեղ ցանկացած ընտրություն, ցանկացած ժողովրդավարություն պետք է պաշտպանի ժողովրդի շահերը: Այս պարագայում համամասնականը լիովին օտարում է ընտրողին այն անձից, ում ընտրողը կցանկանա տեսնել որպես պատգամավոր»,- մեկնաբանեց բանախոսը` հավելելով, որ ընտրողն ընտրում է կուսակցություն, որի մարմնավորումն է կուսակցապետը:
Որպես օրինակ Արման Մելիքյանը նշեց ՀՅԴ-ն. «Քվե տալով` ընտրողը մեծամասամբ ընտրում է Գևորգ Չաուշին և Սերոբ Աղբյուրին, այլ ոչ՝ Հրանտ Մարգարյանին: Սա է մեր կուսակցական իրականությունը: Ես չեմ ցանկանում վիրավորել որևէ մեկի անձը. դա մեր մտածողությունն է»:
Ըստ ԼՂՀ ԱԳ նախկին նախարարի` ներքաղաքական դաշտը զարգանում է ոչ թե որակական առումով, այլ միաբջիջ ամեոբաների կիսման եղանակով:
