Այսօր և վաղը հանրապետությունում առատ ձյան տեղումները կշարունակվեն: «Հայավտոճան» ՊՈԱԿ-ի գլխավոր տնօրեն Հենրիկ Քոչինյանն այսօր լրագրողներին հայտնեց, որ այս պահին ՀՀ հարավային հատվածում՝ Սյունիքում և Վայքում, ձյունը դադարել է, սակայն մնացած վայրերում ձյան տեղումներն այնքան անհանգստություն չեն պատճառում, որքան ուժեղ քամիները:
Սելիմի լեռնանցքում ուժեղ բուք է, ճանապարհը և՛ Եղեգնաձորի, և՛ Մարտունիի կողմից փակ է: Ճամբարակ-Բերդ հատվածում երեկվանից ճանապարհը բաց է, ձյունը շարունակվում է, բայց բուքը դադարել է: Բուք է նաև Լանջիկի և Արագածի հատվածներում:
«Ֆիզիկապես հնարավոր չէ բքի դեմ պայքարել»,- ասաց Հ. Քոչինյանը՝ հավելելով, որ մնացած վայրերում ոչ մի վտանգավոր բան չկա՝ ձյունը մաքրված է, և ճանապարհները երթևեկելի են. «Միակ անհանգստությունն այն է, որ ձնից հետո ջերմաստիճանի անկման դեպքում մերկասառույց է առաջանում, և եթե ջերմաստիճանը -5 աստիճանից ցածր է, աղը չի կարող պայքարել դրա դեմ: Փորձում ենք այլ ինտենսիվ մաքրման միջոցներ կիրառել»:
«Հայավտոճան»-ը պատասխանատու է 3400 կմ միջպետական և հանրապետական ճանապարհների համար: Ըստ տնօրենի՝ բոլոր ձեռնարկությունները ապահովված են բավականաչափ սարքին տեխնիկայով, պաշարված է 5 հազար տոննայի չափ աղ:
