Վրաստանի բուհերում սովորող ադրբեջանցի ուսանողները երեկ բողոքի ակցիա են կազմակերպել Ֆրանսիայի Սենատի կողմից ընդունված ցեղասպանության ժխտումը քրեականացնող օրինագծի դեմ:
Ինչպես տեղեկացրել է վրացական ԱՊԱ գործակալությունը, ադրբեջանցի ուսանողները ադրբեջաներեն, վրացերեն ու անգլերեն լոզունգներ են վանկարկել՝ ուղղված Ֆրանսիայի նախագահ Սարկոզիի դեմ: Այնուհետև Վրաստանում թուրքերի կոնֆեդերացիայի փոխնախագահ Ասադ Ալիևը Ֆրանսիայի Սենատին ուղղված հայտարարություն է կարդացել, որում ասվում է, թե այդ որոշումը խախտում է ոչ միայն թուրքերի ազատ արտահայտվելու իրավունքը, այլև ֆրանսիացիների:
«Այդ գործով պետք է զբաղվի ոչ թե Սենատը, այլ պատմաբանները: Այդ օրենքը հակասում է Ֆրանսիայի Սահմանադրության 34-րդ հոդվածին, ու դա պատճառ կդառնա, որ Ֆրանսիայում սովորող թուրքերը կիսատ թողնեն ուսումը: Այդ օրենքը խոչընդոտում է Հարավային Կովկասում խաղաղության հաստատմանը: Վրաստանում ապրող 600 հազար ադրբեջանցիների անունից այդ որոշման դեմ ենք բողոքում»:
Հայտարարության տեքստը ֆրանսերենով ու անգլերենով ներկայացվել է Ֆրանսիայի դեսպանատուն:
