Այսօր բնակարանը կորցրած բնակիչները նամակ են հանձնել ՀՀ նախագահի օգնականին: Այս մասին «Առաջին լրատվական»-ի հետ զրույցում տեղեկացրեց նախկին Եկմալյան 8 շենքի բնակչուհի Ֆլորա Սարուխանյանը`խոսելով այսօր առավոտյան կայացած ակցիայի շուրջ:
Նա տեղեկացրեց, որ իրենց բնակարաններն ապօրինի կերպով կորցրած բնակիչներն այսօր սպիտակ դրոշակներով կանգնել են ՀՀ նախագահի աշխատանքի գալու ճանապարհին, որպեսզի նրան նամակ հանձնեն, բայց ըստ Ֆլորա Սարուխանյանի, իրենց տեսնելիս չեն կագնել: Ակցիայի մասնակիցները ենթադրել են, որ Սերժ Սարգսյանը տեսնելով իրենց ձեռքի սպիտակ դրոշակները, կկանգնի, կլսի իրենց պահանջը և կստանա իրեն ուղղված նամակը:
«Մեզ մոտեցավ նախագահի նամակների բաժնի վարիչը, բայց մենք պահանջեցինք, որպեսզի մեզ մոտենա նախագահի օգնականը: 20 րոպե անց մոտեցավ օգնականը, և մենք հանձնեցինք մեր նամակը»,- տեղեկացրեց Ֆ. Սարուխանյանը: Ըստ նրա՝ նամակի պահանջն է կամ փոխհատուցել բնակարանների արժեքը կամ վերադարձնել դրանք: Ֆլորան արդեն մի քանի տարի է իր բազմանդամ ընտանիքի հետ բնակարան է վարձակալում:
Հիշեցնենք, որ արդեն մի քանի շաբաթ է, ինչ Եկմալյան, Արամի և մի շարք այլ կենտրոնական փողոցների բնակիչներ պայքարում են 2006 թվականին հանրային գերակա շահ անվան տակ քանդված իրենց բնակարանները վերադարձնելու կամ փոխհատուցում ստանալու համար: 3 շաբաթ շարունակ նրանք ակցիաներ են կազմակերպում և նստացույց անցկացնում նախագահականի մոտ, բայց առայժմ ապարդյուն:
