Թուրքական Hürriyet Daily News թերթի փոխանցմամբ՝ Թուրքիայում ներգաղթյալների վերաբերյալ օրենքում ուղղումների ներդրումից կտուժեն ոչ միայն Թուրքիայում աշխատող Հայաստանի Հանրապետության քաղաքացիները, այլև նրանց երեխաները:
Այս կապակցությամբ Ստամբուլում գործող Մխիթարյան վարժարանի տնօրեն Գարեգին Պարսամյանը հայտարարել է. «Այդ երեխաները մեծացել են Թուրքիայում: Այստեղ նրանք կրթություն են ստացել: Եթե նրանք հետ ուղարկվեն, ապա նրանց կյանքը գլխիվայր շուռ կգա:
Ներկայիս դրությամբ Ստամբուլում սովորում է 60 հայ աշակերտ: Թուրքիայի կրթության նախարարությունը 2011/2012 ուսումնական տարվա համար Թուրքիայի քաղաքացիություն չունեցող հայ երեխաներին թույլատրեց հաճախել Ստամբուլի հայկական կրթօջախներ: Սակայն նրանք գտնվում են «հյուր աշակերտի» կարգավիճակով, և այն ավարտելու դեպքում նրանց չի տրվում համապատասխան վկայական:
1923 թվականի Լոզանի պայմանագրի համաձայն՝ Թուրքիայում դպրոցներում սովորող ազգային փոքրամասնությունների ներկայացուցիչները պետք է ունենան Թուրքիայի քաղաքացիություն:
Թեև ներկայիս օրենսդրական ուղղումները թվում են ունիվերսալ, այնուամենայնիվ, դրանց իրական թիրախում են հայտնվել հայերը: 2010 թվականին վարչապետ Էրդողանը բացորոշ սպառնացել էր երկրից վտարել Թուրքիայում ապօրինաբար աշխատող 100,000 հայերին»:
