Грузия Online-ի փոխանցմամբ՝ Թուրքիայում ընդունված անցագրային օրենսդրության մեջ արված ուղղումները չեն համապատասխանում անցագրային ռեժիմի վերաբերյալ կնքված թուրք-վրացական համաձայնագրի պայմաններին: Այս մասին հայտարարել է Վրաստանի փոխարտգործնախարար Դավիթ Ջալագանիան:
Վերջինիս խոսքերով՝ ներկայումս կողմերը բանակցում են այդ օրենքի համապատասխանեցման շուրջ. «Մենք կարծում ենք, որ այդ օրենքը չի համապատասխանում երկկողմանի համաձայնագրին: Մենք փորձում ենք առավելագույն ձևով այն համապատասխանեցնել անցագրային ռեժիմին»:
Հիշեցնենք, որ Թուրքիայի Սահմանադրությունում կատարված այդ ուղղումներն ուժի մեջ են մտնելու փետրվարի 1-ից: Ըստ այդ ուղղումների՝ օտար երկրների քաղաքացիները Թուրքիայում կարող են գտնվել 3 ամիս ժամկետով, որից հետո պետք է լքեն երկիրը: Նրանք կարող են նույն 3 ամսով վերադառնալ միայն 3 ամիս անց: Այսինքն՝ ողջ տարում նրանք Թուրքիայում կարող են գտնվել 6 ամսից ոչ ավելի:
Ներկայումս Թուրքիայում կարծիքներ են հնչում, թե այդ ուղղումների ներդրումը պայմանավորված է նաև Ֆրանսիայում Հայոց ցեղասպանության հերքումը քրեականացնող օրինագծի ընդունմամբ: Այդ ուղղումներով՝ Թուրքիայի վարչապետ Էրդողանը քողարկված ձևով իրականացնում է Թուրքիայում աշխատող հայերին երկրից վտարելու վերաբերյալ նախկինում երկու անգամ հնչեցրած իր սպառնալիքները: