Հունվարի 27-ին, ԼՂՀ մարտական դիրքում հրազենային մարմնական վնասվածքից մահացած ժամկետային զինծառայող Փայլակ Շահնազարյանին երեկ հուղարկավորել են:
Տավուշի մարզի Ակնաղբյուրի գյուղապետ Կարեն Դոհմազյանը «Առաջին լրատվական»-ի հետ զրույցում նշեց, որ զինծառայողի ընտանիքը, որի միակ արու զավակն էր Փայլակը, անասելի ծանր վիճակում է: Ամբողջ համայնքը չի կարողանում հասկանալ, թե դեռ դպրոցական հասակից իր համեստությամբ և խելքով աչքի ընկնող տղան ինչպես կարող էր այդպիսի մի անմիտ իրավիճակի հետևանքով զրկել ընտանիքին միակ արու զավակով երջանկանալու երազանքից:
Ըստ Կարեն Դոհմազյանի, Փայլակ Շահնազարյանի ընտանիքը սոցիալական միջին պայմաններով ապրող, հասարակ ընտանիք է, հարգված և սիրված ամբողջ համայնքի կողմից: Իսկ տղան, որն ընդամենը 9 ամիս առաջ է ավարտել դպրոցն ու մեկնել ծառայության, վեճ ու կռիվների մեջ երբեք չի հայտնվել:
Գյուղապետը նշեց, որ Փայլակ Շահնազարյանի սպանության մանրամասներին իրենք էլ տեղեկանում են լրատվամիջոցներից, և առայժմ միայն նույն վարկածն են անընդհատ լսում, որ միջադեպը ծագել է այն բանից հետո, երբ գիշերը քնած Շահնազարյանի երեսին ծառայակիցը կատակով ատամի մածուկ է քսել: Այնուհետև զինվորն արթնանալով՝ հայհոյել է ատամի մածուկը քսողին, ինչն էլ առաջացրել է նույն զորամասի ժամկետային զինծառայող, եֆրեյտոր Խաչատուր Սարգսյանի վրդովմունքը, որը նախ՝ տեղից բացականչել է, թե «ո՞ւմ մայրիկը…», ապա կրակել Շահնազարյանի վրա:
Պաշտպանության նախարարության քննչական ծառայության հասարակայնության հետ կապերի ավագ սպա Մերի Սարգսյանը մեզ հետ զրույցում չհաստատեց, որ սպանությունը տեղի է ունեցել նման իրավիճակում: Նա հայտնեց, որ մանրամասները պարզ կդառնան նախաքննության ավարտից հետո:
Նշենք, որ փաստի կապակցությամբ ՀՀ պաշտպանության նախարարության քննչական ծառայության երրորդ կայազորային քննչական բաժնում Քրեական օրենսգրքի 104 հոդվածի 1-ին մասով նախատեսված հանցագործության հատկանիշներով (սպանություն) հարուցվել է քրեական գործ, և կատարվում է նախաքննություն: Ըստ Մերի Սարգսյանի` սպանություն կատարելու կասկածանքով շաբաթ օրը ձերբակալվել է նույն զորամասի ժամկետային զինծառայող, եֆրեյտոր Խաչատուր Սարգսյանը: Քրեական գործի նախաքննությունը շարունակվում է: