Թուրքական Zaman թերթի փոխանցմամբ՝ Ստամբուլում տեղի է ունեցել հակաահաբկչական գագաթնաժողով, որին մասնակցել են տվյալ ոլորտի բոլոր մասնագետները: Գագաթնաժողովում քննարկվել է Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) դեմ պայքարի հարցը:
Գագաթնաժողովում որոշվել է, որ PKK-ի դեմ ձեռնարկվելիք պայքարի առյուծի բաժինը վերաբերելու է խնդրի ֆինանսական կողմին: Այդ պլանում կարևորվել է PKK-ի ֆինանսական աղբյուրները կտրելը:
Այդ նպատակով պետք է պայքար տարվի Թուրքիայի արևելյան ու հարավարևելյան հատվածում գործունեություն ծավալած գործարարների դեմ, որոնք աջակցում են PKK-ին: Թուրքական կողմը պնդում է, որ նրանք PKK-ին տարեկան վճարում են 120 միլիոն դոլարի տուրք: Բացի այդ, PKK-ն օտար բանկերի միջոցով ստանում է 1 միլիարդ դոլար:
Հիշեցնենք, որ նախորդ տարվա հոկտեմբերի սկզբին թուրքական լրատվամիջոցները գրել էին, որ եվրոպական 14 երկրներ բանկերի միջոցով գումարներ են փոխանցում PKK-ի հաշվին։ Վերջին 1 տարվա ընթացքում PKK-ն ստացել է 200 միլիոն եվրո։ Այդ նպատակով հիմնականում գործածվում է «Եվրոպա-Հաքքարի-Շըրնաք-Վան-Իրաք-Իրան» գիծը։
