Տավուշի մարզի զորամասերից մեկում, ըստ պաշտոնական վարկածի, ինքնասպանության արդյունքում մահացած պայմանագրային զինծառայող, լեյտենանտ Արտակ Նազարյանի գործով Իջևանում կայանալիք դատաքննությանը տուժող կողմը չի մասնակցի. տուժող կողմը որոշել է բոյկոտել դատական նիստերը:
Այս մասին այսօր հայտարարեցին տուժող Արտակ Նազարյանի իրավահաջորդ Ծովինար Նազարյանը, տուժողի իրավահաջորդի ներկայացուցիչներ՝ փաստաբաններ Մուշեղ Շուշանյանը և Ռուբեն Մարտիրոսյանը:
Տուժող կողմը և պաշտպանական կողմը կարծես թե միավորված են. մի բան, որ նմանատիպ գործերի դեպքում հազվադեպ է հանդիպում: Ամբաստանյալներ (դեպքի պահին՝ շարքայիններ) Հարութիկ Կիրակոսյանի, Մխիթար Մխիթարյանի և Ադիբեկ Հովհաննիսյանի պաշտպան Ալվարդ Մնացականյանը ևս հայտարարեց, որ միանում է բոյկոտին, քանի դեռ դատաքննությունը չի տեղափոխվել Երևան:
Բոյկոտին միանալու մասին հայտարարել էին նաև մյուս երկու պաշտպանները` ամբաստանյալ Հակոբ Մանուկյանի պաշտպան Հրանտ Գևորգյանը, որը քննչական գործողություններին մասնակցելու պատճառով չէր կարողացել ներկա գտնվել ասուլիսին, և ամբաստանյալ Վահագն Հայրապետյանի պաշտպան Լևոն Պողոսյանը:
Պաշտպանները հեռախոսային խոսակցության միջոցով հայտնել էին իրենց համաձայնությունը: Սակայն այսօր նրանք լրատվամիջոցներին այդ մասին չեն հայտարարել, հետևաբար դժվար է միանշանակ ասել, որ նրանք չեն մասնակցի վաղվա դատավարությանը: