Հայաստանի` Եվրոպային մերձենալու հարցը ԵՄ-ի և Բրիտանական խորհրդի համար կարևոր հարց է. դրա վկայությունն է Արևելյան գործընկերության ծրագիրը, որով ԵՄ-ի ու տարածաշրջանային երկրների միջև համագործակցությանը մեծ ուշադրություն է դարձվում: Այսօր կայացած մամուլի ասուլիսի ժամանակ այս մասին ասաց Հայաստանում Մեծ Բրիտանիայի դեսպան Քեթրին Լիչը:
Լրագրողներից մեկի հարցին` չի՞ կարծում, որ ԵՄ անդամ դառնալու համար Թուրքիան պետք է ճանաչի Հայոց ցեղասպանությունը, դեսպանը նշեց. «Միացյալ Թագավորությունը երկար ժամանակ աջակցել է Թուրքիային, որպեսզի վերջինս դառնա ԵՄ անդամ: Բայց, ինչպես հայտնի է, ԵՄ անդամության համար տվյալ երկիրը պետք է բարեկամական հարաբերություն ունենա իր հարևանների հետ: Այդ է պատճառը, որ Հայաստանի և Թուրքիայի միջ հարաբերությունների կարգավորումը մեզ համար առանցքային հարց է:
Մենք պատրաստ ենք աջակցել ցանկացած նախաձեռնության, որը միմյանց կմոտեցնի երկու երկրները: Դա լավագույն պատասխանն է, որ կարող էի տալ»:
Քեթրին Լիչը նաև նշեց, որ իր ուշադրության կենտրոնում այս պահին գտնվող ամենակարևոր հարցն առաջիկա խորհրդարանական ընտրություններն են: «Մենք գիտենք, որ ԵՄ-ն և ԵԱՀԿ-ն լարված աշխատում են, որպեսզի գարնանը Հայաստանում կայանալիք ԱԺ ընտրությունները լինեն ամենաարդարն ու ազատը: Սա հայ ժողովրդի համար շատ կարևոր պահ է, որպեսզի նա մի քայլ անի դեպի Եվրոպա և ժողովրդավարություն»,- նշեց նա:
«Առաջին լրատվական»-ի հարցին` պատրաստվո՞ւմ է դեսպանությունը և անձամբ դեսպանը ընտրությունների նախաշեմին ակտիվ համագործակցություն ծավալել հայաստանյան հասարակական կազմակերպությունների հետ, Լիչն ասաց. «Մենք հուսով ենք, որ ՀՀ նախագահը նախորդ ընտրությունների նման՝ հրավերներ կուղարկի Հայաստանում գործող դեսպանություններ` ընտրությունների ընթացքում դիտորդական առաքելություն իրականացնելու համար»:
