Բելգիայում հունվարի 29-ի երեկոյան սկսվել է 24-ժամյա գործադուլ, որը կազմակերպել են երկրի խոշոր արհմիությունները: Դրանով նրանք իրենց բողոքն են արտահայտում տնտեսական խիստ միջոցների և սոցիալական օգնության ծրագրի կրճատման դեմ:
Ինչպես հայտնում է France 24-ը, գործադուլի պատճառով դադարեցվել են հանրային տրասպորտի աշխատանքները, թերթերը չեն տպագրվել, փակվել են կրթական հաստատությունները, կրճատվել է ռադիոյի և հեռուստատաեսության հեռարձակումները:
Բժշկական հաստատություններում աշխատում է միայն շտապ բուժօգնության ծառայությունը: Փակ են նաև պետական հաստատությունները, արդյունաբերական և սպասարկման ոլորտի ձեռնարկությունները, այդ թվում՝ նաև խանութները:
Սպասվում է, որ փակվելու է նաև երկրի՝ մեծությամբ երկրորդ օդանավակայանը, որը գտնվում է Շարլերուա քաղաքում: Արհմիությունը նախատեսում է նաև նստացույց կազմակերպել Բրյուսելի անցակետերում:
Արհմիությունների ներկայացուցիչների խոսքերով՝ տնտեսական խիստ միջոցները ո՛չ Բելգիայում, ո՛չ ԵՄ-ում խնդրի լուծում չեն:
Նշենք, որ գործադուլը համընկել է Բելգիայի մայրաքաղաք Բրյուսելում ԵՄ արտահերթ գագաթնաժողովի հետ:
