Թուրքիայի Եվրամիության հետ հարաբերությունների գծով նախարար Էգեմեն Բաղըշը Ցյուրիխում լրագրողների հետ զրույցում կիրակի ասել է, թե ցեղասպանության ժխտումը քրեականացնելու մասին Ֆրանսիայի ընդունած օրենքը որևէ նշանակություն չի կարող ունենալ։ Այս մասին հաղորդում է «Ազատություն» ռադիոկայանը։
«Հուսամ, Ֆրանսիայում խոհեմ մարդկանց թիվն ավելին է, քան խենթերինը»,- ասել է նախարարը և ավելացրել. «Մենք հիմա Շվեյցարիայում ենք, և ես հայտարարում եմ, որ 1915թ. տեղի ունեցած իրադարձությունները ցեղասպանություն չեն։ Դե թող գան և ձերբակալեն ինձ»։
Բաղըշը Շվեյցարիա է մեկնել Դավոսի տնտեսական համաշխարհային համաժողովին մասնակցելու համար։
Թուրքիայի պատվիրակության կազմում են փոխվարչապետ Ալի Բաբաջանը, Կենտրոնական բանկի նախագահ Էրդեմ Բաշչին, քաղաքական այլ գործիչներ և գործարարներ։
Հաղորդելով Բաղըշի հնչեցրած հայտարարության մասին լուրը` Թուրքիայում հրատարակվող Zaman-ը նշել է, որ Շվեյցարիայում կա օրենք, որը պատիժ է նախատեսում ռասիստական հայտարարությունների, ինչպես նաև ցեղասպանությունների փաստը հրապարակավ հերքելու համար։
Շվեյցարիայի իշխանությունները հավաստիացրել են, թե իրենց օրենքը շատ առումներով տարբերվում է Ֆրանսիայում ընդունված օրենքից և կոչված է խթանել երկրում առկա օտարատյացության դեմ պայքարը, քանի որ անցած երկու տասնամյակում աջակողմյան խմբավորումները հետզհետե ավելի հաճախ են հարձակվում արտասահմանցիների վրա։
Բաղըշը Ցյուրիխում պնդել է, թե ֆրանսիացիների ընդունած օրինագիծը գոյության հնարավորություն չունի և սոսկ դատարկ թղթի կտոր է։
Թուրք մեկնաբանները նշում են, որ օրինագծի խնդրում կարող է միջամտել Ֆրանսիայի Սահմանադրական դատարանը, սակայն դրա համար անհրաժեշտ է, որ առնվազն 60 սենատոր պաշտոնապես դիմի դատական գերագույն ատյանին։
Մինչդեռ Ֆրանսիայի նախագահի գրասենյակը հայտնել է, որ նախագահՆիկոլա Սարկոզին մտադիր է սահմանված ժամկետում վավերացնել օրենքը։
Ֆրանսիայի Սենատը օրինագիծն ընդունել է հունվարի 23-ին, իսկ խորհրդարանի ստորին պալատը` Ազգային ժողովը, այն ընդունել էանցած տարվա դեկտեմբերի 22-ին։
Թուրքերը պնդում են, թե Սարկոզին այդ օրինագիծն օգտագործում է ապրիլին կայանալիք նախագահական ընտրություններում ֆրանսահայերի մեծ համայնքի աջակցությունը ստանալու համար։
«Թուրքերն այդպես են ընկալում»,- The Los Angeles Times պարբերականին ասել է Միջազգային ճգնաժամային խմբի թուրքական ծրագրի ղեկավար Հյու Փոուփը։
The Los Angeles Times-ը նշել է. որ Թուրքիան ունի խիստ օրենքներ, որոնց համաձայն` «թուրքական ինքնությունը վիրավորելու» համար կարելի է բանտում հայտնվել, և Հայոց ցեղասպանության ճանաչումը հենց այդ կարգի խախտում է համարվում։
Հյու Փոուփի խոսքով, այնուամենայնիվ, անցած տարիների ընթացքում Թուրքիայում իրավիճակը փոխվել է։
«Ես հիշում եմ, որ ժամանակին հնարավոր չէր նույնիսկ արծարծել այդ թեման»,- ասել է վերլուծաբանը։