ՀՀ կրթության և գիտության նախարար, ՀՀԿ անդամ Արմեն Աշոտյանն առաջիկա խորհրդարանական ընտրությունների ժամանակ համամասնական ցուցակով առաջադրվելու որոշում դեռ չի կայացրել: Ինչպես «Առաջին լրատվական»-ի հետ զրույցում նշեց Ա. Աշոտյանը, ցանկացած որոշում կուսակցությունում ընդունում է կուսակցության ղեկավարությունը. «Նման որոշում կայացնելու և չկայացնելու դեպքում ես կենթարկվեմ այդ որոշմանը»:
Նա նշեց, որ, որպես նախարար, քաղաքական ուղիղ հարցերի դեռ չի պատասխանում, անուղղակի կերպով, բնականաբար, պարբերաբար անդրադառնում է քաղաքականությանը: «Որպես կուսակցական՝ ընկղմված եմ լինելու իմ հարազատ կուսակցության նախընտրական գործունեության մեջ, բայց ոչ որպես կրթության և գիտության նախարար և ոչ ի հաշիվ իմ այսօր զբաղեցրած պաշտոնի»,- նշեց Ա. Աշոտյանն ու հավելեց. «Իմ անձնական քաղաքական կրեդոն այն է, որ նախարարության աշխատանքով, ոլորտում տեղի ունեցող բարեփոխումներով, իմ անձնական աշխատանքով, համակարգի աշխատանքով, ապահովել լավագույն PR-ը, ընկալումը արդյունքով, ոչ թե խոսքով ու կեղծ խոստումներով, որպեսզի իրականում ցույց տալ՝ ում խոսքն է գործ»:
