«Առաջին լրատվական»-ի բանակը՝ որպես ինստիտուտ, որքանո՞վ կարելի է կայացած համարել հարցադրմանը ազգագրագետ Աղասի Թադևոսյանը երկու տեսանկյունից է մոտենում: Առաջին՝ հայկական բանակը՝ որպես ռազմական ինստիտուտ, մասնագիտական, փորձագիտական գնահատականների համաձայն, բավականին կայացած ինստիտուտ է: Մեկ այլ տեսանկյունից բանակը երիտասարդությանը հայրենիքի պաշտպանների վերածելու ինստիտուտ է: Ազգագրագետի խոսքերով, բանակը այնպիսի տեղ է, որտեղ գնում է 18-19 տարեկան երիտասարդը, որպեսզի ձեռք բերի զինվորական հմտություններ, որ պատերազմական իրավիճակներում պատշաճ կարգով իր այդ կարողությունը ցուցաբերի, պաշտպանի հայրենիքը թշնամուց, և ամենակարևորը՝ պաշտպանի իր կյանքը, որովհետև զինվորի կյանքը ամենակարևոր բանն է պատերազմի ընթացքում:
«Այս իմաստով եթե փորձենք խնդրին նայել, ապա մենք հիմա առնչվում ենք բանակում ապօրինությունների, անօրինականությունների, և այդ առումով բանակը կայացման մեծ խնդիր ունի: Եթե մարդիկ չեն վստահում իրենց երեխաներին բանակ ուղարկել, վախենում են, որ հատկապես կիրթ տղաները բանակում իրենց կյանքը կվտանգեն անկիրթ, տգետ սպաների, զինվորների, կրիմինալ օրենքների պատճառով, որոնք բանակում շատ են՝ դատելով վերջին շրջանում սպանությունների և ինքնասպանությունների թվից, ապա պետք է ասել, որ բանակը շատ լուրջ խնդիրներ և անելիքներ ունի: Հատկապես կանոնադրության ամրապնդման առումով, որը կերաշխավորի զինվորի կյանքը զորամասում և մարդկանց մոտ մեծ կասկածներ և անվստահության զգացում չի առաջացնի»,- ասաց ազգագրագետը:
