Մարդահամարի արդյունքները բավականին ավելացրած ցույց կտան: «Առաջին լրատվական»-ի հետ զրույցում նման կանխատեսում արեց Ժողովրդի իշխանություն հասարակական-քաղաքական նախաձեռնության խորհրդի անդամ, տնտեսագետ Մովսես Արիստակեսյանը: Ըստ նրա՝ կա մեթոդաբանական խնդիր. բնակչության պետական ռեգիստրի և մարդահամարի նորմատիվային դաշտն իրար հետ չեն խոսում: Շատ մեծ վտանգ կա, որ մարդկանց, ովքեր վաղուց լքել են Հայաստանը, կարող են հաշվառել մշտական բնակչության մեջ՝ հակասելով մարդահամարի կողմից սահմանված նորմատիվին: Ըստ Մ. Արիստակեսյանի՝ կա այդպիսի գնահատական, որ վերջին 4 տարվա ընթացքում ՀՀ-ից մոտ 500 հզ. մարդ է արտագաղթել:
«Մշտական բնակչության մեջ պետք է հաշվառվեն մինչև 1 տարի արտագաղթածները, իսկ ունենք 500 հզ.-ից ավելի արատգաղթողներ: Իմ գնահատականներով, դա ոչ թե 500, այլ 680 հազար է: Իսկ այս մարդահամարի արդյունքում մենք կարող ենք այդ 680 հզ.-ին ունենալ ընտրողների ցուցակում ներառված»,- մտահոգություններով կիսվեց Մ. Արիստակեսյանը:
Նա նաև նշեց, որ պարզապես շատ վատ է կատարվում այն խնդիրը, որ պետռեգիստրի օրենքով է սահմանված՝ արտագաղթող անձինք 1 տարուց հետո պետք է հաշվառումից անպայման դուրս գան: Իհարկե, մարդհամարը չի լուծում հաշվառման հարցը, այլ լուծում է առկա բնակչության խնդիրը: «Բայց հենց այդտեղ մարդահամարի հաշվառման թերթիկում կոնկրետ չէր նշված «1 տարի բացակայողների թիվը», այլ նշված էր «ցանկացած ժամկետում բացակայողների թիվը», և դա մտահոգություն է հարուցում, որ կարող է մշտական բնակչության մեջ հաշվառվել»,- նշեց Մ.Արիստակեսյանը:
